Qyzylordalyq politsiia qyzmetkeri Maqsat Hasenov áriptesterimen birge 17 adamdy órtten qutqaryp qaldy. Tártip saqshysy bul áreketin óziniń azamattyq mindeti sanaidy, dep habarlaidy QazAqparat.
Oqiǵa ótken jyldyń tamyz aiynda boldy.
Sol kúni Qyzylorda qalasy politsiia basqarmasynyń kezekshi bólimine habar kelip tsúken edi. Onda oblys ortalyǵy boiyndaǵy Qorqyt ata kóshesi men Óserbaev kósheleriniń qiylysynda kóp qabatty úidiń birinen órt shyqqany aitylǵan. Tórtinshi qabatta ornalasqan páterdiń órtenip jatqanyn estigen politseiler dereý áreketke kiristi.
Jedel qyzmet mamandarymen birge politsiia qyzmetkerleri Maqsat Jylqaidarov, Maqsat Hasenov jáne Baqytjan Dosmaǵambetov oqiǵa ornyna kelip jetti.
«Biz oqiǵa ornyna barǵan sátte podezden qoiý qara tútinniń shyǵyp jatqanyn ańǵardyq. Kóp oilanyp turatyn ýaqyt joq. Dereý áreketke kiristik. Turǵyndardy dereý syrtqa shyǵaryp úlgerdik. Odan keiin páterdi ashyp, janyp jatqan dúnielerdi óshirýge tyrystyq. Páter ieleri úide joq eken. Osylaisha adamdar ómirin aman saqtap qaldyq. Biz óz mindetimizdi oryndadyq», - deidi Maqsat Hasenov.
Órttiń kórshi páterlerge taralý qaýpi bar ekenin ańǵarǵan Maqsat Hasenov pen Baqytjan Dosmaǵambetov jalynnyń odan ári órshýine jol bergen joq.
Al Maqsat Jylqaidarov ótkir tútin saldarynan páterlerinen shyǵa almai qalǵan turǵyndarǵa kómektesti. Olardyń arasynda úlkenderdiń baqylaýynsyz qalǵan balalar da bar edi.
Órt saldarynan jaryq ta sónip qalǵan bolatyn. Osyndai qiyndyqtarǵa qaramastan politsiia qyzmetkerleri óz mindetterin joǵary deńgeide atqaryp shyqty. Nátijesinde barlyǵy 17 adam órtten qaýipsiz aimaqqa shyǵaryldy.
Politsiia kapitany Maqsat Hasenov ishki ister organdarynda 2013 jyldan beri qyzmet atqaryp keledi. Otbasyly, 2 bala tárbieleýde.
