Qyzylorda oblysynda 27-29 mamyr aralyǵynda kórnekti aqyn, Memlekettik syilyǵyqtyń laýreaty Fariza Ońǵarsynovanyń 80 jyldyǵyna jáne kórnekti aqyn, ádebi synshy, aýdarmashy Jarasqan Ábdrashevtiń shyǵarmashylyǵyna arnalǵan «Parasatty poeziia» atty ekinshi halyqaralyq festival ótti.
Festivalge Túrkiia, Ázerbaijan, Qyrǵyzstan, Tatarstan jáne Qazaqstannyń 11 óńirinen qatysýshylar jinaldy. Sonymen qatar, sharaǵa Fariza Ońǵarsynova men Jarasqan Ábdrashevtiń týystary qatysty.
Festivalge Túrkiia jáne Ázerbaijan Jazýshylar Odaǵynyń múshesi Mehmed Nýri Parmaksyz, Ázerbaijan Jazýshylar odaǵynyń múshesi, baspasóz hatshysy Haial Rza, Qazaqstan Jazýshylar Odaǵy tóraǵasynyń birinshi orynbasary, aqyn Aqberen Elgezek, "Juldyz" jýrnalynyń bas redaktory, aqyn Ǵalym Jailybai, Qazaqstan Jazýshylar odaǵynyń músheleri, aqyn Baibota Qoshym-Noǵai, Qalqaman Sarin, Ularbek Nurǵalym, Miras Asan, Bekzat Smadiiar, Aibol Islamǵali jáne t.b. qatysty. Sondai-aq, sharanyń qurmetti qonaqtary - Fariza Ońǵarsynovanyń sińilisi Almagúl men uly Almas Ońǵarsynovtar, Jarasqan Ábdirashevtiń uly Rústem Ábdirashev pen nemeresi Ábilhaiyr Ábdirashev arnaiy keldi.
Festival aiasynda sharaǵa qatysýshylar oblystyń barlyq 7 aýdanynda bolyp, kezdesýler men poeziia keshteri uiymdastyryldy. Sonymen qatar, Qyzylorda qalasynyń kórikti jerlerin aralap kórdi.
Búgin N. Bekejanov atyndaǵy teatrda ótken sharada oblys ákimi Qyrymbek Kósherbaev Syr óńiri talaidy tańdai qaqtyrǵan, Syr súleileri degen ataýdy ulttyq mádeniet tórinde berik ornyqtyrǵan jyrshy-jyraýlardyń, daraboz aqyndar men shaiyrlardyń mekeni ekenin atap ótti.
«Uly daladaǵy halyqtyq dástúrde shyǵarmashylyq adamyna degen riiasyz yqylas ejelden qalyptasqan. Olarǵa degen alǵaýsyz kóńili men qurmetiniń sheti de, shegi de joq ekeni barshaǵa aian. Bir ǵana mysal aitaiyn. Qazir aimaǵymyzda Nartai, Ábdilda, Manap, Asqar, Qaltai, Turmaǵambet, Qarasaqal Erimbet esimderimen atalatyn eldimekender, bilim ordalary bar. Bul - ónerge degen eldiń sheksiz yqylasynyń bir kórinisi emes pe? Jalpy, oily sóz saptai bilý, sóz qadirin túsiný, qudiretin seziný, kesteli sózben órnekteý - bizdiń halyqqa berilgen úlken syi», - dedi aimaq basshysy.
Poeziia keshinde respýblikaǵa belgili aqyndar Qalqaman Sarin, Aqberen Elgezek, Ǵalym Jailybai, sondai-aq syrboiylyq sóz sheberleri Elýbai Áýezov, Ǵaziza Ábilda, Nazgúl Berdiqoja, Bibolat Sátjan, Aqjol Túmenbai, Asylzat Arystanbek óner kórsetti.
Sharada ótken jylǵy "Uly dala úni" festivali qatysýshylarynyń shyǵarmalar jinaǵy men Jarasqan Ábdirashulynyń «Dala, seniń ulyńmyn» atty kitabynyń tusaýkeseri ótti.
Aita keteiik, búgin aimaq basshysy Q.Kósherbaev "Parasatty poeziia" festivaliniń qatysýshylarymen kezdesip, óner salasyn qoldaý boiynsha óńirde júrgizilip jatqan jumystar týraly áńgimelesip, oilaryn ortaǵa salǵan bolatyn.
