Foto: HTP24
Qyzylorda oblysynda oqýshylarǵa jaramdylyq merzimi ótip ketken ónimder berilip kelgen. Mektepterde tyiym salynǵan taǵamdar da paidalanylǵan, dep habarlaidy «Ult aqparat» Almaty telearnasyna silteme jasap.
Oqý ordasynyń as máziri de talapqa sai bolmai shyqqan. Bilim berý nysandarynyń ashanalaryn aralap kórgen qalalyq máslihat depýtattary oqý ordalarynda ystyq tamaqpen qamtýdyń sapasy syn kótermei turǵanyn aitty.
"Ashana blogynda aspazshylarǵa arnalǵan qolkeptirgish ornatylýy kerek. Barlyq mektepte ornatylmaǵan. Synǵan ydystardy paidalanbaý talaptary Qyzylorda qalasy № 212 mektepte saqtalmaǵan. Qyzylorda qalasy №179 mekteptiń kásipkeri sertifikatta kórsetilgen jaramdylyq merzimi ótip ketken ónimderdi jáne tyiym salynǵan tushpara, shujyq, qatparly qamyr ónimderin paidalanǵan", - deidi oblystyń bala quqyqtary jónindegi ýákili Japyraq Uzaqbaeva.
Qyzylorda qalasynda 34 myńnan asa oqýshy tegin tamaqpen qamtamasyz etilse, onyń 13 myńǵa jýyǵy - áleýmettik az qamtylǵan sanattaǵylar. Biýdjettik ótinimge sáikes, bastaýysh synyptarǵa bir kúnge 560 teńge, al joǵary synyptarǵa 582 teńge bekitilgen. Qalalyq prokýratýranyń qaýlysymen 45 mekteptiń ashanasy tekserilip, 2 million teńgeden astam aiyppul salyndy. Tiisti talaptardy oryndamaǵan 4 kásip iesiniń isi sotta qaralyp jatyr.
