Qyzylorda oblysynda búginde kózi tiri 16 soǵys ardagerine birjolǵy materialdyq kómek retinde 1 mln 111 myń teńgeden beriledi, dep habarlaidy "Ult aqparat".
Soǵys jyldarynda Syr óńirinen maidanǵa 70 myńǵa jýyq adam attandy. Olardyń teń jarymyna jýyǵy týǵan jerge oralǵan joq. Qazir Qyzylordada 16 qart jaýynger turady. Olardyń 9-y - soǵys ardageri bolsa, 7-i - soǵys múgedegi.
«Uly Otan soǵysynyń ardagerlerine jáne olarǵa teńestirilgen azamattarǵa birjolǵy materialdyq kómek kórsetýge oblystyq jáne aýdandyq biýdjetten qarjy bólindi. Onyń ishinde, qatysýshylar men múgedekterine, tylda qajyrly eńbegi men minsiz áskeri qyzmeti jáne keminde 6 ai jumys istegen azamattarǵa, ekinshi ret nekege qurmaǵan, qaitys bolǵan soǵys múgedekteriniń jáne solarǵa teńestirilgen múgedekterdiń áielderine áleýmettik tólem tólendi. Sondai-aq, ardagerlerge dástúrli azyq-túlik sebetteri usynylady»,-dedi oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Talǵat Dúisebaev.
Bul maqsatta jergilikti biýdjetten 452 mln teńgeden astam qarjy bólindi. Basqarmanyń málimetinshe, bul sanatta 4335 adam bar. Ot pen oqtyń ortasynan esen-saý oralǵan, ortamyzda júrgen 16 qariiaǵa birjolǵy materialdyq kómek retinde 1 mln 111 myń teńgeden beriledi. Tyldaǵy qajyrly eńbegi jáne minsiz áskeri qyzmeti úshin KSRO ordenderimen, medaldarymen marapattalǵandarǵa – 183 myń, tylda keminde jarty jyl jumys istegenderge, ekinshi ret nekelespegen, qaitys bolǵan soǵys múgedekteri men olarǵa teńestirilgen múgedekterdiń áielderine nemese kúieýlerine 100 myń teńgeden tiesili.
Soǵys surapylyn kórgen tarih kýágerleri sondai-aq «Birgemiz» qoǵamdyq qorynan 50 myń teńgeden alady. Jeńisti jaqyndatýǵa eseli eńbegimen eleýli úles qosqan jandarǵa qarjylai qoldaýdan bólek, Jeńistiń 75 jyldyǵyna arnalǵan medal tabystalady.
