Qyzylordada tabiǵat qorǵaý inspektorlary teksergen kólikten Qyzyl kitapqa engen qaraquiryqtyń ushasy tabylǵan. Alaida taǵy eki adam kelip inspektorlarǵa myltyqtan oq atyp, qaraquiryq ushasyn tartyp alyp ketken, dep habarlaidy "Ult aqparat" Ekologiia, geologiia jáne tabiǵi resýrstar ministrliginiń Telegram kanalyna silteme jasap.
Brakonerliktiń jolyn kesý boiynsha reid barysynda «Ohotzooprom» RMK Qyzylorda oblysy boiynsha filialynyń inspektorlary Jalaǵash aýdanynyń Tógisken jerinde Shardara aýdanynyń Shákili aýylynyń turǵynyn ustaǵan.
«Tekserý kezinde ustalǵan adamnyń kóliginen Qyzyl kitapqa engizilgen qaraquiryqtyń ushasy tabyldy. Kúdikti ustalǵan jerge jedel-tergeý toby shaqyryldy. Inspektorlar politsiia qyzmetkerlerin kútip turǵanda Qyzylorda qalasynyń eki turǵyny oqiǵa ornyna kelip, inspektorlardyń qyzmettik kólikteriniń biriniń dóńgelegine myltyqtan oq atqan. Sodan keiin inspektorlarǵa qaýip tóndirip, qaraquiryq ushasyn alyp ketken», delingen habarlamada.
Uzamai inspektorlar men quqyq qorǵaý organdarynyń qyzmetkerleri oq atqan brakonerlerdi de ustady. Atalǵan fakti boiynsha QR Qylmystyq kodeksiniń 337-babynyń 4-tarmaǵy («Zańsyz ań aýlaý») jáne 380-babynyń 2-tarmaǵy («Bilik ókiline qatysty zorlyq-zombylyq qoldaný») boiynsha Jalaǵash aýdandyq politsiia bólimshesinde qamaýǵa alyndy.
Eske sala ketsek, ótken aptada Qyzylordada tabiǵat qorǵaý inspektorlaryna oq atqan eki adam ustalǵany habarlandy.
