Saltanatty jiynda aimaqtyń úzdik qurylysshylaryna qurmet gramotasy, alǵys hattar men qurmetti qurylysshy ataǵy tabystaldy.
Qyzylorda oblysynyń ákimi Qyrymbek Kósherbaev sala qyzmetkerlerin kásibi merekelerimen quttyqtap, aimaqtyń osy salada qol jetkizgen tabystaryn atap ótti.
«Qurylysshylardyń eren eńbekteriniń arqasynda búgingi kúni bizdiń óńirimiz qurylys qarqyny boiynsha aldyńǵy qatarda keledi. Sońǵy bes jylda 200 áleýmettik nysandy paidalanýǵa berdik. Jalpy aýdany 2 mln. sharshy metr turǵyn úi el igiligine berilip, 7 myńnan astam qyzylordalyqtar qonys toiyn toilady. Biylǵy jyldan bastap turǵyn úi qurylysynyń «Orda» jol kartasy júzege asyrylatyn bolady. Oblys boiynsha 1747 páterdi quraityn 69 turǵyn úidiń qurylysy, sonymen qatar, Syrdariia ózeniniń sol jaq jaǵalaýyn igerý jumystary da qarqyndy júrgizilýde»,-dedi aimaq basshysy.
Qazirgi tańda, Syrdariia ózeniniń sol jaq jaǵalaýynda jeke investitsiia esebinen kópqabatty 18 turǵyn úidiń, «Bolashaq» ýniversiteti kampýsynyń, MJK aiasynda 320 orynǵa arnalǵan balabaqshanyń qurylysy jáne memlekettik biýdjet esebinen Jastarǵa qyzmet kórsetý ortalyǵynyń, elektrmen, gazben, sýmen jabdyqtaý jáne káriz júiesiniń qurylys jumystary júrgizilýde.
2019-2020 jyldary sol jaǵalaýda taǵy da birneshe kópqabatty úiler, mektepter, oblystyq kópsalaly aýrýhana, neke qiiý saraiy, balabaqsha, jataqhanasymen birge fizika-matematikalyq mektep, saýda jáne oiyn-saýyqtyrý kesheniniń qurylysy josparlanyp otyr.
Biyl "Nurly jer" turǵyn úi qurylysynyń baǵdarlamasy aiasynda aimaqta 69 kóp páterli turǵyn úidiń qurylysy júrgizilýde. Bul aýdany 123,3 myń sharshy metr bolatyn 1747 páterden quralady.
Onyń ishinde 21 úi jeke qurylys kompaniialarynyń esebinen salynýda. Búgingi tańda oblys boiynsha 40 injenerlik infraqurylymdyq joba boiynsha jeli 495 shaqyrymǵa keńeidi.
Buǵan qosa, memlekettik biýdjet esebinen jaǵalaýdy, tórt jalǵa beriletin jáne tórt kredittik úidi, sondai-aq uzyndyǵy 5 shaqyrym avtojoldy jóndeý jumystary júrgizilýde.
Jyl basynan beri oblysta 41 áleýmettik nysannyń qurylysy júrgizildi, onyń 33-i ótken jylǵy jáne 8 jańa nysan. Olardyń 20-y iske qosyldy, jyl sońyna deiin 10 nysan paidalanýǵa beriledi, 2019 jyly taǵy 11-i aiaqtalady. Osy maqsatta respýblikalyq jáne oblystyq biýdjetten 27,6 mlrd. teńge bólindi.
Aita keteiik, sońǵy 5 jylda oblysta 200 áleýmettik nysan salyndy.
