Qyzylorda qalasynda kólikter qozǵalysy men qoǵamdyq oryndardyń jumysyna shekteý qoiyldy. Bul jóninde oblystyń bas memlekettik sanitar dárigeri Áliia Ábdiqaiymova arnaiy qaýly shyǵardy.
Oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń habarlaýynsha, qaladaǵy kólikter qozǵalysy men qoǵamdyq-kópshilik oryndardyń jumysyna shekteý qoiylǵan.
Qyzylorda qalasynyń avtovokzaly men rettelmeitin avtoturaqtardan júretin oblysaralyq, qalaaralyq, aýdanaralyq avtobýstar, shaǵyn avtobýstar, taksiler jáne ózge de avtokólikpen jolaýshy tasymaldaý 30 naýryzda saǵat 00.00-den bastap toqtatylady. Sondai-aq, dál osy ýaqyttan oblys ortalyǵyndaǵy saiabaqtar, saýnalar men massaj bólmeleri, biliard bólmeleri, internet klýbtar, oiyn bólmeleri, boýling ortalyqtary, býkmekerler, sporttyq keshender (úiirmeler, sektsiialar), fýtbol alańdary, balalardyń damý ortalyqtary jáne basqa da halyq kóp shoǵyrlanǵan nysandardyń jumysy toqtatylady.
Al avtokólik, kiim-keshek, mal bazarlary, toihanalar, toi salondary, banket zaldary jáne úi jaǵdaiynda ótkiziletin barlyq merekelik, dástúrlik (ózge ulttardyń ata-analar kúni, quran oqytý t.b.) is-sharalarǵa da shekteý qoiyldy.
Qyzylordada 28 naýryzda koronavirýs juqtyrǵan alǵashqy adam tirkelse, 29 naýryzda ol naýqaspen qarym-qatynasta bolǵan medbikeden de sol diagnoznaqtylandy. Búgin óńirde koronavirýs juqtyrǵan taǵy úsh adam anyqtaldy.
