Qyzylorda oblysynda bir otbasynda tórt adam koronavirýs infektsiiasyn juqtyrǵan, dep habarlaidy "Ult aqparat".
Búgin Qyzylorda oblysynda qaterli dertti juqtyrýdyń 7 jaǵdaiy tirkeldi. Olardyń 5-eýi Qyzylorda qalasynda turatyn bolsa, qalǵan ekeýi Qarmaqshy jáne Jalaǵash aýdandarynyń turǵyndary bolyp otyr.
«PTR taldaýlary 2 adamnan somatikalyq aýrýlar boiynsha aýrýhanaǵa jatar aldyndaǵy tekserý kezinde alynǵan. Al 4 adamnan koronavirýs infektsiiasyn juqtyrǵan naýqastarmen jaqyn qarym-qatynasta bolǵandyǵy sebepti alynǵan, Taǵy 1 adam profilaktikalyq maqsatta ózdiginen aqyly negizde analiz tapsyrǵan. Taldaý nátijeleri koronavirýs infektsiiasyna oń nátije kórsetti. 1 adamnan koronavirýstyń belgisi baiqalsa, 6 jaǵdai klinikalyq belgisinsiz tirkelip otyr. Naýqastarmen bailanysta bolǵan adamdardyń barlyǵy meditsinalyq baqylaýǵa alyndy. Profilaktikalyq jáne epidemiiaǵa qarsy sharalar júrgizilýde», - dep málim etti Qyzylorda oblysynyń sanitariialyq-epidemiologiialyq baqylaý departamenti.
Vedomstvo ókilderiniń habarlaýynsha, naýqastardyń arasyndaǵy jasy eń úlkeni 74 jastaǵy adam bolsa, eń kishisi qashyqtyqta oqityn bala. Olardyń ishinde 4-i bir otbasynda turady.
