Búgin Qyzylordada Batyrhan Shúkenovke eskertkish ornatyldy, dep habarlaidy "Ult aqparat" ákimdikke silteme jasap.
Oǵan Batyrhan Shúkenovtiń týǵan-týysy, dostary men jerlesteri qatysty. Sondai-aq, sharaǵa qurmetti qonaq retinde ánshiniń jaqyn dosy Baiǵali Serkebaev arnaiy keldi.
«Búgin Syr eli talantty perzentine máńgilik eskertkish ornatyp, iltipatyn bildirip jatyr. Bul eskertkish onyń týǵan qalasynyń tórinde jarqyrap, kórkine kórik qosary sózsiz. Onyń ústine osy saiabaq Batyrhannyń esimimen atalyp, keleshekte jastardyń, ánshini qurmetteitin turǵyndardyń jaqsy bir demalys ornyna ainalar dep senemiz. Syr boiynyń talantty uly, óner tarlany Batyrhan Shúkenovtiń esimi qazaqstandyqtardyń júreginde máńgi saqtalady», - dedi oblys ákiminiń orynbasary Rýslan Rústemov.
Ánshiniń anasy Diliara Shúkenova oblys basshylyǵy men is-sharany uiymdastyrýshylarǵa óz rizashylyǵyn bildirdi.
«Baiqaýdy uiymdastyryp, eskertkishti ornatýǵa atsalysqan barlyq azamattarǵa úlken rahmet. Ulyma eskertkish qoiyp, onyń qurmetine saiabaqtyń atyn bergenderińizge óte qýanyshtymyn», - dedi Batyrhan Shúkenovtiń anasy Diliara Shúkenova.
Músinge Batyrhan Shúkenovtiń «Otan-Ana» klipindegi qolynda saksofon ustap turǵan beinesi alynǵan. Eskertkishtiń jalpy biiktigi 3,6 metr, músinniń biiktigi - 2,2 metr, materialy - qola; tuǵyrdyń biiktigi - 1,6 metr.
Esterińizge sala ketelik, biz budan buryn Biz budan buryn Batyrhan Shúkenovtiń esh jerde oryndalmaǵan 13 áni jinaqtalǵan jańa albomy jaryqqa shyǵatynyn habarlanǵan edik. Sondai-aq, keshe Batyrhan Shúkenovke arnalǵan «Otan-Ana» baiqaýynyń jeńimpazdary anyqtaldy.
