«Prezidenttiń bes áleýmettik bastamasyn» baqylaý jónindegi respýblikalyq qoǵamdyq keńestiń tóraǵasy Baqytjan Tursynuly Jumaǵulov bastaǵan delegatsiia Qyzylorda oblysyna is-saparmen keldi. Is-sapar barysynda keńes tóraǵasy aimaqtaǵy áleýmettik jáne ónerkásiptik obektilerdiń jumysymen tanysyp, «Prezidenttiń bes áleýmettik bastamasy» boiynsha kezdesýge qatysty.
Baqytjan Jumaǵulov Syrdariia ózeniniń sol jaǵalaýyndaǵy «7-20-25» baǵdarlamasyn iske asyrý aiasyndaǵy turǵyn úi qurylysy jumystarymen tanysty. Eske sala keteiik, aǵymdaǵy jyly Qyzylorda oblysynda «Orda» turǵyn úimen qamtamasyz etýge arnalǵan jol kartasy sheńberinde halyqtyń áleýmettik osal toptaryn qoljetimdi baspanamen qamtý josparlanýda.
Osylaisha, kezektegi adamdarǵa Syrdariianyń sol jaǵalaýynan satyp alýǵa qoljetimdi 14 kópqabatty úidiń qurylysy bastaldy. Atap óteiik, oblysta turǵyn úi kezeginde 27 myń adam, sonyń ishinde Qyzylorda qalasynyń 23 myń turǵyny bar.
Sondai-aq, qoǵamdyq keńestiń tóraǵasy 2017 jyldyń qarashasynda bastalǵan «Qaraózek» joǵary tehnologiialyq gazdy kompressorlyq stantsiiasynyń qurylysy barysymen jáne osy jyldyń sáýir aiynda «Shaǵyn nesie berýdi kóbeitý» tórtinshi bastamasy aiasynda ashylǵan «Q-med» klinikasynyń jumysymen tanysty.
Sonymen qatar, Baqytjan Jumaǵulov úsh ailyq kýrstarda 3 jáne 4 sanatty gaz dánekerleýshileri bilim alatyn «Elektrotehnologiia» JShS oqý ortalyǵy men «Bolashaq» ýniversitetinde de boldy.
Dostyq úiinde oblys ákimi Qyrymbek Kósherbaevtyń, respýblikalyq qoǵamdyq keńestiń tóraǵasy Baqytjan Jumaǵulovtyń, «Nur Otan» partiiasynyń hatshysy Farhad Qýanǵanovtyń, tiisti memlekettik organdar ókilderiniń, saiasi partiia jáne qoǵam belsendileriniń qatysýymen Memleket basshysynyń bes áleýmettik bastamasyn Qyzylorda oblysynda júzege asyrý boiynsha keńes bolyp ótti.
Oblys ákimi Qyrymbek Kósherbaev Memleket basshysy tapsyrmasynyń aimaqta iske asý barysy týraly baiandama jasady. Shaǵyn jáne orta kásipkerlikti qoldaý men mikrokreditter sanynyń ulǵaiýy arqyly aǵymdaǵy jyldyń 6 aiynyń ishinde ózin-ózi tiimsiz jumyspen qamtyǵan jáne jumyssyz 97538 adamnyń 27 myńnan astamy jumysqa ornalastyryldy.
«2018 jyldyń basynda oblysta ózin-ózi tiimsiz jumyspen qamtyǵan jáne jumyssyz 97538 adam anyqtaldy. 2018 jyldyń 6 aiynda 7000-nan astam adamdy jańa jumys oryndaryna ornalastyryp, 20400-den asa jumyssyzdy ónimdi jumyspen qamtyp, 20 myń azamattyń qyzmetin zańdastyryp, onyń 17 myńǵa jýyǵy jumys berýshilermen eńbek kelisimshartyn jasady. 3000-ǵa jýyǵy memlekettik kiris organdaryna jeke kásipker retinde tirkelip, zańdy túrde kásipterin bastady»,- dedi oblys ákimi.
Oblystyq bilim basqarmasy basshysynyń orynbasary Aqzira Qasymova óńirdegi joǵary bilimniń qoljetimdiligi men sapasyn jaqsartý jáne stýdenttik jataqhanalar jaǵdaiyn jaqsartý boiynsha júrgizilip jatqan jumystar týraly baiandady.
Máselen, Syrdariianyń sol jaǵalaýynda memlekettik-jeke áriptestik sheńberinde «Bolashaq» ýniversitetiniń qazirgi stýdenttik kampýsynyń qurylysy júrgizilýde.
5 áleýmettik bastamany iske asyrý týraly ortalyq atqarýshy organdardyń basshylary josparlanǵan is-sharalar sheńberindegi jańa múmkindikter týraly baiandady.
Kezdesýdi qorytyndylai kele, áleýmettik bastamalardy iske asyrý jónindegi keńestiń tóraǵasy Baqytjan Jumaǵulov óńirde atqarylǵan jumystardy joǵary baǵalady.
Tústen keiin delegatsiia músheleri 10 fermany biriktirgen«Shieli-tórt túligi» aýyl sharýashylyq kooperativi men táýligine 400 litr shubatqa deiin óńdeitin «Arý Ana» tsehyn da aralap kórdi.
