Qyzylorda oblysynyń ákimi Gúlshara Ábdiqalyqova Syrdariia aýdanyna saparlap, Tereńózek kentin kógildir otynǵa qosý rásimine qatysty, dep habarlaidy "Ult aqparat".
Atap aitqanda, búgin oblys ákimi Gúlshara Ábdiqalyqova jumys saparymen Syrdariia aýdanyna baryp, birqatar áleýmettik mańyzy bar nysandy aralady. Aldymen aimaq basshysy Jetikól aýyldyq okrýgine at basyn buryp, «Jumyspen qamtý jol kartasy» aiasynda júzege asqan turǵyn úilerdi sýmen jabdyqtaý júiesin qaita jańǵyrtý jumystarymen tanysty.
«Korporatsiia Álem-Qurylys» JShS-i qolǵa alǵan jobanyń quny 144,5 mln. teńgeni quraidy. Qaita jańǵyrtý jáne keńeitý jumystary arqyly 18 jumys orny ashylǵan. Aýyz sý qubyry munarasynda aýdan ákimi Talǵat Dúisebaev Jetikól eldi mekeniniń turǵyndary úshin mańyzdy turǵyn úilerdi sýmen jabdyqtaý jumystarynyń oryndalý barysyn baiandady.
Munan keiin, oblys ákimi aýyldyq okrýgtegi №174 orta mekteptiń jáne «Balaýsa» shaǵyn ortalyǵynyń jumysymen tanysty. 320 oryndyq mektepte 158 oqýshy bilim alady. Oqý ordasy janynan 25 oryndyq «Balaýsa» shaǵyn ortalyǵy ashylǵan. Búgingi kúni mektepte 60 qyzmetker, shaǵyn ortalyqta 11 maman jumys atqarady. Gúlshara Ábdiqalyqova shaǵyn ortalyqtyń jumysyn baǵamdap, balalardyń saqtyǵy máselesine jete mán berýdi tapsyrdy.
Jumys sapary barysynda oblys ákimi Tereńózek kentine baryp, kenttegi gaz qubyrlary jáne kvartalishilik gaz qubyrlarynyń qurylysymen tanysyp, aýyl turǵyndaryna kógildir otyn berý rásimine qatysty. Jalpy quny 2,4 mlrd teńgeni quraityn Tereńózek kentindegi kvartalishilik gaz qubyrlary jelisiniń qurylysy 2019-2020 jyldary júzege asty. Oblys ákimi 11 myńnan astam turǵyndy gazben qamtamasyz etýge múmkindik bergen aitýly kúnde syrdariialyq turǵyndarǵa tabys tilep, qýanyshtaryna ortaqtasty.
«Kent ortalyǵyna qosylyp jatqan alaý otynymyz, kógildir gaz ár otbasyna óziniń jylylyǵymen kele bersin. Álemdi sharpyǵan daǵdarysqa qaramastan, áleýmettik mańyzy bar qurylys, gazdandyrý sekildi kúrdeli bastamalardy keiinge qaldyrmai, iske asyryp kelemiz.
Ótken jyly Aral aýdanyndaǵy Jaqsyqylysh, Qazaly aýdanyndaǵy Muratbaev jáne Shieli aýdanyndaǵy Baisyn eldi mekenderi gazǵa qosyldy. Nátijesinde, qazirgi tańda oblys turǵyndarynyń 65 paiyzy tabiǵi gazǵa qol jetkizip otyr. Aýdan ortalyqtaryn tolyq gazdandyrǵannan keiin, oblystaǵy eldi mekenderge kógildir otyn jetkizý josparymyzda bar. Bul – bir aýdannyń ǵana emes, oblystyń qýanyshy. Ár otbasynan jylý ketpesin, Otanymyzdyń qýaty arta bersin»,-dedi oblys ákimi.
Eldi mekenderdi gazǵa qosý kezeń-kezeńimen iske asady. Syrdariia aýdanynda joba boiynsha birinshi kezekte Tereńózek kentine jaqyn ornalasqan Qaljan ahýn, Sáken Seifýllin, Asqar Toqmaǵambetov jáne Syrdariia ózeniniń ońtústigine gaz qubyryn ótkizip, Shaǵan eldi mekeni kógildir otynǵa qosylady.
Aita keteiik, Oblysta Aral, Qazaly, Shieli, Jańaqorǵan aýdandarynyń ortalyqtary men Baiqońyr qalasy kógildir otynǵa qosylǵan. Qalǵan 3 aýdan ortalyǵy - Josaly, Jalaǵash, Tereńózek, sondai-aq, Sekseýil, Tóretam, Aqai eldi mekenderin gazdandyrý kezeń-kezeńimen júzege asyp jatyr.
Kentti kógildir otynǵa qosý rásiminde aýdandyq ardagerler keńesiniń tóraǵasy Qairolla Ábenuly el igiligine baǵyttalǵan, áleýmet úshin ózekti máseleniń sheshimin tapqanyn tilge tiek etip, aýyl turǵyndaryn quttyqtady.
Munan keiin aimaq basshysy Gúlshara Ábdiqalyqova gaz alaýy jaǵylǵan Ǵani Muratbaev kóshesindegi №94 úidiń turǵyny, eńbek ardageri Qonysbek Ábsadyqovtyń úiine baryp, otbasynyń qýanyshymen bólisti.
Syrdariia aýdanyndaǵy jumys saparyn qorytyndylaǵan oblys ákimi aýdan ákimi Talǵat Dúisebaevqa birqatar mańyzdy tapsyrmalar júktedi. Koronavirýstyq infektsiiadan saqtaný baǵytyndaǵy saqtyq sharalaryn saqtaý jáne karantin talaptaryn eskerýdi tapsyrdy. Sondai-aq, áleýmettik-ekonomikalyq tabys kózin quraityn mańyzdy jobalardy iske asyrýdy qaperge saldy.
