Foto: Álihan Sariev
Qyzylorda oblysynda jol-kólik oqiǵasynan bes adam qaza boldy. Olardyń arasynda eki bala bar, dep habarlaidy QazAqparat.
Jol apaty búgin, 26 shildede túngi saǵat úsh shamasynda Jalaǵash aýdanyna qarasty Tań aýyly tusyndaǵy «Samara-Shymkent» avtojolynyń boiynda bolǵan.
«Oqiǵa ornynda 27 jastaǵy azamattyń basqarýyndaǵy «Toyota Camry» jáne 42 jastaǵy azamattyń basqarýyndaǵy «Daewoo-Nexia» jeńil avtokólikteri soqtyǵysqan. Saldarynan eki júrgizýshi, «Daewoo-Nexia» kóligindegi Túrkistan oblysy Ordabasy aýdanynda turatyn 42 jastaǵy jolaýshy, 6, 10 jastaǵy eki bala kóz jumdy», – dep málim etti Qyzylorda oblystyq Tótenshe jaǵdailar departamentinen.
Vedomstvo málimetinshe, oqiǵa ornynda Tótenshe jaǵdailar departamenti, «Josaly» kúrejol meditsinalyq beketi, jedel járdem brigadasy, aýdandyq politsiia bóliminen kelgen mamandar tiisti jumystar atqarǵan.
«Atalǵan derek boiynsha QR Qylmystyq kodeksiniń 345-baby 4-bóligimen (Kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy) sotqa deiingi tergep-tekserý bastaldy. Tiisti saraptamalar taǵaiyndaldy. Oqiǵanyń mán-jaiy anyqtalyp jatyr», - dedi Qyzylorda oblystyq Politsiia departamentinen.
