Qyzylorda oblystyq prokýratýrasy "jer telimderin óz betimen basyp alýdyń" 800-den astam faktisi anyqtalǵanyn málimdedi. Prokýratýranyń málimdeýinshe, "basyp alǵan jer telimderine úi sala bastaǵan" 496 adam anyqtalǵan. Bir ai ishinde 381 turǵynǵa "memleket menshigi quqyǵyn buzǵany úshin" 57 million teńgeden astam ákimshilik aiyppul salynǵan.
Ótken aidyń basynda Qyzylorda oblystyq ákimshiligi alty myńnan astam adamǵa jeke turǵyn úi salýǵa jer telimderi berilgenin habarlaǵan. Jergilikti biliktiń málimdeýinshe, Qyzylordada jer telimin alý kezegine 42 myńǵa tarta azamat tirkelgen.
Prokýratýranyń málimdemesinde "quiylyp qoiǵan irgetastar men turǵyzylǵan úilerge zań talaptarynyń normalary túsindirilip, qalalyq jer qatynastarynyń bailanys telefondary kórsetilgen plakattar ilinip jatqany" aitylady. Plakattar ál-Farabi, Qorqyt ata jáne Aqmarjan aýdandaryndaǵy ondaǵan jer telimine ilingen.
"Memleket menshigindegi jer telimin jergilikti atqarý organynyń tiisti ruqsatynsyz ielenýge jol berilmeidi" delingen prokýratýranyń málimdemesinde.
Resmi málimet boiynsha, "iesiz qalǵan" 243 qurylys ádilet organdaryna "iesiz jyljymaityn múlik" retinde esepke alynyp, odan ary kommýnaldyq menshikke ótkizilmek.
