Búgin Úkimet otyrysynda QR Aýyl sharýashylyǵy ministri Saparhan Omarov egis alańdaryn ártaraptandyrý boiynsha jospardy oryndamaǵan óńirlerdi atady, dep habarlaidy QazAqparat.
«Egis alańdaryn ártaraptandyrý jumystaryn ministrlik turaqty negizde úilestiretin bolady, sondyqtan ákimdikter osy baǵyttaǵy jumysty jandandyrýlary qajet. Bul rette, Qyzylorda oblysynda kúrish alańyn qysqartý jónindegi kórsetkish oryndalmaǵanyn atap ótken jón. Máselen, memorandýmǵa sáikes Qyzylorda oblysynda 2020 jyly 75 myń gektardy quraýy tiis edi, alaida naqty egis alańy
89 myń gektardy qurady. Iaǵni indikativtik kórsetkishterdiń jyl saiynǵy artýy 14 myń gektardan asady. Osyǵan uqsas jaǵdai Almaty men Túrkistan oblystarynda da oryn alýda, olarda kórsetkishten artyǵy tiisinshe 500 gektardy jáne 2,3 myń gektardy quraidy», - dedi ministr.
Sonymen qatar, Túrkistan oblysynda da maqta alańdaryn qysqartý boiynsha kórsetkish oryndalmaǵan. Máselen, biylǵy maqtanyń naqty kólemi memorandýmda kózdelgen alańnan 16 myń gektarǵa artyq boldy. Budan basqa, Qyzylorda jáne Túrkistan oblystarynda bidai alańyn qysqartý boiynsha kórsetkish oryndalmaǵany anyqtaldy. 2020 jyly Qyzylorda oblysynda bidai egiletin alań Memorandýmda kózdelgennen eki ese asyp tústi.
Túrkistan oblysy boiynsha da osyǵan uqsas jaǵdai oryn aldy, onda jyl saiyn naqty alań memorandýmnyń indikativti kórsetkishterinen asady.
«Bul jerde Almaty oblysynyń kórsetkishi úlgi bola alady, onda bidaidyń alańy 11 myń gektarǵa tómendegen, osylaisha memorandýmnyń indikativti kórsetkishteri oryndalǵan», - dedi S. Omarov.
