Qyzylorda oblysynyń ákimi Gúlshara Ábdiqalyqova óńir jurtshylyǵyna koronavirýsqa qarsy kúres sharalaryna bailanysty úndeý joldady, dep habarlaidy QazAqparat.
Óńir basshysy virýstyń aimaq ekonomikasyna áser etip, densaýlyq saqtaý salasynyń qalypty júiesin ózgertkenin aitty.
«Infektsiialyq aýrýlardyń aǵymyn aldyn ala dál boljap bilý múmkin emes. Degenmen, alǵashqy kúnderden virýsqa qarsy arnaiy sharalar qabyldandy. Qatań birlesken tártiptiń arqasynda indettiń alǵashqy legin tejei aldyq. Alaida, ekonomikalyq - áleýmettik qajettilikten qatań shekteýlerdi jeńildettik. Sonyń negizinde turǵyndar arasynda sanitarlyq talaptardy eskermeý beleń aldy. Virýstyń baryna senbeýshilik kóbeiip, oqshaýlanýdan shyǵyp, kópshilik bas qosýlar jiiledi. Indetti juqtyrǵandardyń sany búgingi kúni 1379 jetti. Onyń ishinde 897 adam dertten aiyqty. Koronovirýs infektsiiasy anyqtalǵan azamattarmen qarym-qatynasta bolǵan 7929 adam bizdiń baqylaýymyzda boldy. 56 277 synama test alyndy. Ókinishke qarai, densaýlyq saqtaý ministrligi janyndaǵy arnaiy komissiianyń sheshimimen eki naýqastyń koronovirýstan qaitys bolǵany anyqtaldy. Sondyqtan barlyq múmkindikter jumyldyrylyp indettiń odan ári taraýyn shekteý jumystary atqarylýda»,- dedi oblys ákimi Gúlshara Ábdiqalyqova.
Óńirimizde infektsiialyq statsionarda-515,provizorlyq statsionarda-1670 tósek oryn daiyndalǵan.
Sondai-aq, infektsiialyq statsionarda- 200, provizorda - 1257 naýqastar emdelýde. Oblysta barlyǵy 76 jasandy ókpeni jeldetý apparaty bar. Maýsym aiynda qosymsha 20 portativti ókpeni jeldetý apparaty alynyp, dál osyndai qurylǵynyń 63-ne Qazaqstan Respýblikasy Densaýlyq saqtaý ministrligine satyp alý týraly ótinim joldanǵan. Sondai-aq, búgingi kúni oblystyq meditsinalyq mekemelerde 5 kompiýterlik tomografiia jumys isteidi. Qajettilikke bailanysty taǵyda osyndai 2 apparat alý josparlanýda. Óńirde maýsym aiynda pnevmoniia dertiniń asqynýyna bailanysty úide em alýshylarǵa qosymsha kómek berý maqsatynda dárigerlik mobildik toptar qurylyp, ákimdiktiń qyzmettik avtokólikteri berilgen.
Oblys ákimi Gúlshara Ábdiqalyqova memlekettik Bas sanitarlyq dárigerdiń qaýlysyna sáikes óńirde jańa shekteýler engiziletinine toqtalyp ótti.
«Tiisti sharalar buqaralyq aqparat quraldary, áleýmettik jeliler arqyly sizderge habarlanady. Bul profilaktikalyq sharalar koronovirýstyń keń taralýyn barynsha azaitýǵa, turǵyndardyń ómiri men densaýlyǵyn saqtaýǵa múmkindik beredi. Óńirimizde engiziletin shekteýlerge túsinistikpen qarap, qoldaýǵa shaqyramyn. Biz «bir jeńnen qol, bir jaǵadan bas shyǵaryp« saqtyq sharalaryn qoldansaq qana bul jumystar nátijeli bolady. Árqaisymyz jaqyndarymyzǵa janashyr bolyp, yntymaq pen birliktiń arqasynda indettiń betin qaitaramyz»,- dedi oblys ákimi.
