Foto jýrnalist Gúlmira Ábiqaidyń Facebook áleýmettik jelisindegi jeke paraqshasynan alynǵan
Qyzylorda oblysy Syrdariia aýdanynda 5 bala eki aiǵa jýyq ýaqyt boiy anasynyń kesirinen jan baǵyp ómir súrip jatyr. Áiel balalardy ákesine tastap, jaqsy ómir súrgisi kelip, oblys ortalyǵyna ketip qalǵan. Sonymen qatar, ol balalardyń járdemaqysy men 10 jastaǵy ulynyń múgedektigine bailanysty zeinetaqysy túsetin barlyq kartasyn alyp ketken, - dep habarlaidy Tengrinews.kz tilshisi.
Bul týraly onyń jubaiy Qaisar Balmanov aityp berdi. Er adamnyń aitýynsha, áieli 31 jasta, ol ishimdik pen temekige táýeldi bolǵan.
"Bes balamnyń anasy týraly bulai aitý ońai emes, biraq jaǵdai solai. Bir jylǵa jýyq ýaqyt ishinde ol qatty ózgerip ketti. Iship-shege bastady, úiden ketip qala berdi. Ózimen birge kartalardy alyp ketedi. Onda balalardyń járdemaqysy, ortanshy ulymyzdyń múgedektigine bailanysty zeinetaqysy túsedi. Shamamen 200 myń teńge. Buǵan deiin ol 10 kúnge ketip qaldy, biraq keiin ózi kelip, 2 kún úide boldy. Keiin qaita qashyp ketti. Eki aidan asa ýaqyttan beri eshqandai habar joq", - deidi ol.
50 jastaǵy Qaisar Balmanov jumysqa shyǵa almaidy, óitkeni barlyq ýaqyty bala tárbiesine ketedi. Óziniń aitýynsha, buryn ol mehanizator, kúrish ósirýshi bolyp jumys istegen. Qazir úi sharýasymen ainalysady.
"5 balamyz bar. Úlken qyzymyz 12 jasta, ol Nur-Sultandaǵy mektep-litseide oqidy. Ájesimen turady. Al eń kishisi 4 jasta. Qazir qolymda 4 kishkentai bala bar. Ýaqytym taǵam ázirleýge, úi jinaýǵa, úlkenderin mektepke, kishilerin balabaqshaǵa jiberýge ketedi. Sonymen qatar, 10 jastaǵy ulymyz kishkentaiynan múgedek, tserebraldy sal aýrýyna shaldyqqan. Ony bir minýtqa da qaldyra almaimyn, óitkeni sóilemeidi, ózdiginen eshteńe istei almaidy. Jergilikti ákimdik azyq-túlikpen qamtamasyz etip otyr, al mektep balalaryma tegin tamaq beredi. Áitpese baiaǵyda ashtyqqa ushyraityn shyǵarmyz", - dep qosty ol.
Er adam eshteńege shaǵymdanbaidy, tek quzyretti organdardan múgedektik boiynsha zeinetaqy men balalardyń járdemaqysyn óz atyna resimdeýin suraidy.
"Bul aqsha qalypty ómir súrýimizge jetedi. Turǵyn úiimiz bar, 2 bólmeli úide turamyz. Ázirge balalar kishkentai, siiamyz", - deidi Balmanov.
Syrdariia aýdandyq ákimdigi ókili bul otbasy únemi aýyl ákimshiliginiń baqylaýynda ekenin atap ótti.
"2021 jylǵy sáýir men mamyrda olarǵa azyq-túlik berildi, al qarashada aýyl kásipkeriniń demeýshiligimen eki tonna kómir berildi. Jańa jyl qarsańynda balalarǵa merekelik syilyqtar berildi", - dep atap ótti aýdandyq ákimdiktiń baspasóz qyzmeti ókili.
Aýdandyq bilim bólimi qyzmetkeri aýdan ákimdigi janyndaǵy kámeletke tolmaǵandardyń isteri jónindegi komissiianyń qaraýyna balalardyń anasyn ata-ana quqyǵynan shekteý týraly usynys túskenin aitty.
"Osydan keiin ǵana balalardyń járdemaqysyn, múgedektigi boiynsha zeinetaqyny Qaisar Balmanovtyń atyna resimdei alamyz", - dep atap ótti aýdandyq bilim bóliminiń ádiskeri Gúljanat Qasymova.
