Qyzylorda oblysy ákimi úkimettik emes uiymdarmen kezdesý barysynda áleýmettik jobalardy qalyptastyrý kezinde ǵylymi-zertteý ortalyqtarymen júrgizilgen zertteý jumystarynyń qorytyndysy, óńirlik statistikalyq kórsetkishter, BAQ-tar men internet resýrstarda jii kóteriletin máseleler, úkimettik emes uiymdardyń bastamalary eskerile otyryp ázirlenip jatqanyn aitty.
«Oblysta aýyldyq deńgeidegi ÚEU áleýetin arttyrý úshin jergilikti biýdjetten qarjylandyrý kólemi jyldan-jylǵa artyp keledi. Máselen, 2017 jylǵy 181 jobanyń 100-i Qyzylorda qalasy jáne aýdan ákimdikterimen iske asqan bolsa, aǵymdaǵy jylǵy 139 áleýmettik jobanyń 79-y aýdandyq deńgeide júzege asyrylýda. Osy oraida jobalaryń basym bóligi qoǵamdyq kelisimdi jáne ulttyq birlikti nyǵaitýǵa, jastar saiasatyn iske asyrý men balalar bastamalaryn qoldaý, halyqtyń áleýmettik turǵydan osal toptaryna qoldaý kórsetý áleýmettik qyzmet salalarynda ekenin atap ótken jón», - dedi oblys ákimi.
Sondai-aq, aimaq basshysy Qyzylorda oblysy ÚEU qyzmetin qarjylandyrý boiynsha kóshbasshylar qatarynda ekenin atap ótti.
«2017 jyldyń qorytyndysy boiynsha Qyzylorda oblysy Úkimettik emes uiymdardyń qyzmetin belsendi etý boiynsha qarjylandyrý jaǵynan Astana men Almaty qalalarynan keiin 3-shi oryndy ielendi. Bul sizder men bizderdiń birlikte atqarǵan jumysymyzdyń nátijesi dep bilemin. Budan basqa, aimaqta Úkimettik emes uiymdardy biýdjetten tys kózderden qarjylandyrylady», - dedi aimaq basshysy.
Atap aitqanda, óńirde «Daǵdarys jaǵdaiyna tap bolǵan balalar men analarǵa arnalǵan áleýmettik qonaq úi» jobasy iske asyrylýda. Qazaqstan Respýblikasy Din isteri jáne azamattyq qoǵam ministrliginiń granty negizinde jergilikti Úkimettik emes uiymdarǵa ádistemelik kómek kórsetý úshin jariialanǵan konkýrstyń jeńimpazy bolyp «Qyzylorda oblysynyń Azamattyq Aliansy» Qaýymdastyǵy Úkimettik emes uiymdarǵa arnalǵan resýrstyq ortalyq taǵaiyndaldy.
Óńirimizdegi ońtaily isterdiń jalǵasy retinde áleýmettik jobalardy uzaq merzimdi qarjylandyrý máselesi, onyń ishinde múgedek azamattardy ońaltý men áleýmettendirýge baǵyttalǵan jobalardy qarjylandyrý máselesi oń sheshimin tapqan. Mysalǵa: múgedekterdiń aqparattyq tehnologiialyq saýattylyǵyn kóterý, elektrondy ákimdik baǵdarlamasyn qoldanýdy úiretý, «Invataksi» áleýmettik jobalary.
Budan basqa, aimaqtaǵy qoǵamdyq keńesterdiń qyzmetin turǵyndar arasynda keńinen nasihattaý maqsatynda Úkimettik emes uiymdarmen birlesip, qoǵamdyq baqylaýdy damytý áleýmettik jobasy iske asyryla bastady.
Jergilikti qoǵamdyq birlestikterdiń basshylary salalary boiynsha júzege asyrylyp jatqan jobalar týraly baiandama jasady.
Kezdesý barysynda bilik pen úkimettik emes uiymdardyń ózara qarym-qatynasyn ornyqtyratyn keńester jáne ortalyq atqarý organdarynda salalyq úkimettik emes uiymdar qatysýlarymen konsýltativtik-keńestik organdardyń qyzmet jasaýy, elimizdiń áleýmettik modernizatsiiasynda úkimettik emes uiymdardyń alatyn orny men bilikpen birlesken is-qimyldyń mańyzy jaily aityldy, azamattyq qoǵam ókilderi úkimettik emes sektoryn damytý sharalary jaily usynys-pikirlerin aitty.
