Keshegi demalys kúnderi Qyzylorda oblysynyń aýdandarynda 2 mektep, 2 balabaqsha, 2 sporttyq-saýyqtyrý kesheni men mádeniet úii ashyldy.
Aýdandarǵa jumys sapary aiasynda oblys ákimi Qyrymbek Kósherbaev nysandardyń ashylý rásimine qatysty.
Atap aitqanda, Qarmaqshy aýdanynda № 183 Ú.Tomanov atyndaǵy orta mektep pen 50 oryndyq «Samal» balabaqshasynyń ashylýy ótti.
«Elbasymyz Nursultan Ábishuly Nazarbaev 2020 jylǵa deiin bilim salysyna qatysty 3 mindet qoiǵan bolatyn: úsh aýysymdyq jáne apattyq mektepterdi joiý jáne 3-6 jastaǵy búldirshinderdi balabaqshamen qamtý. Úsheýin de Qyzylorda oblysy merziminen buryn oryndady. 2015 jyly úsh aýysymdyq mektepterdi túbegeili joiýǵa qol jetkizdik jáne 3-6 jas aralyǵyndaǵy búldirshinderdi mektepke deiingi tárbiemen qamtamasyz etýdi merziminen buryn 100 paiyzǵa oryndadyq. Munda memlekettik-jekemenshik áriptestikti damytýdyń úlesi basym ekenin aitý kerek. Búgingi kúni balabaqshalardyń 71 paiyzy memlekettik-jekemenshik negizinde jumys isteidi», - dedi aimaq basshysy.
Atap óteiik, sońǵy bes jyldyń ózinde Qarmaqshy aýdanynda 4 memlekettik balabaqsha, 3 mektep, 3 aýyldyq klýb, 1 tarihi ólketaný murajaiy, 3 dárigerlik ambýlatoriia jáne táýligine 250 kelýshige arnalǵan aýdandyq emhananyń qurylysy júrgizilip, halyq igiligine berildi. Odan bólek, Tórebai bi aýyldyq okrýginde balabaqshanyń qurylysy jáne Tóretam kentinde dene shynyqtyrý saýyqtyrý kesheni qurylystary júrgizilýde.
Jańaqorǵan aýdanynda mektep, balabaqsha jáne sporttyq-saýyqtyrý kesheni, al Shielide Mádeniet úii men taǵy bir sport kesheni paidalanýǵa berildi.
Jańaqorǵan aýdanynyń Túgisken aýylynda 140 oryndyq balabaqsha men sporttyq-saýyqtyrý kesheni ashylsa, Qojamberdi aýylynda 200 orynǵa arnalǵan mektep paidalanýǵa berildi. Bilim uiasynyń burynǵy ǵimaraty 2000 j. asar ádisimen salynǵan.
Biyl Shieli aýdany 90 jyldyq mereitoiyn atap ótpek. Ataýly kúnge orai aýdanda Mádeniet úii men sporttyq-saýyqtyrý kesheni ashyldy.
Oblys ákiminiń aitýynsha, 2013 jyldan bastap aýdanda 6 aýyldyq klýb, Y.Jaqaevtyń týǵan aýylynda mýzei, tarihi-ólketaný mýzeii salyndy. Taǵy da 11 mádeni nysan kúrdeli jóndeýden ótti, al jyl sońyna deiin Tartoǵai aýyldyq okrýginde 150 oryndyq mádeniet úii paidalanýǵa beriletin bolady.
Sońǵy 5 jylda Qyzylorda oblysynda 200 áleýmettik nysan salyndy.
