Biyl Qyzylorda oblysy ákimi bilim granttarynyń sany 2 esege deiin kóbeiip, olardyń 70%-y aqparattyq tehnologiialar salasyndaǵy mamandyqtarǵa bólinetin bolady. Bul týraly Qyzylorda oblysynyń ákimi Qyrymbek Kósherbaev oblystyq máslihat sessiiasynyń otyrysynda habarlady.
Eske salaiyq, aimaqta 2013 jyldan beri jyl saiyn aýyldyq jerlerdegi kópbalaly jáne turmysy tómen otbasynan shyqqan daryndy túlekter úshin oblys ákiminiń 100 granty bólinetin. Búginde mundai grantty ielenýshilerdiń sany 700 -ge jetti.
Biyldan bastap oblys ákiminiń granty 2 esege ósip, 205-ke jetip otyr.
«Aǵymdaǵy jyly oblys ákimi grantynyń sany 2 esege deiin kóbeiip, olardyń 70%-y aqparattyq tehnologiialar salasyndaǵy mamandyqtarǵa bólinetin bolady», - dep atap ótti aimaq basshysy.
Esterińizge salsaq, 2014 jyldan bastap Resei Federatsiiasy Úkimetiniń esebinen aimaqtyń mektep bitirýshi túlekteri Máskeý men Sankt-Peterbýrgtiń úzdik tehnikalyq joǵary oqý oryndaryna oqýǵa jiberilýde. Alǵashqy 75 túlektiń 62-si diplomdaryn alyp, elge oralsa, 13 túlek magistratýrada oqýlaryn jalǵastyrady. Olardy jumyspen qamtý máselesi qarastyrylýda.
«Oblystyń birqatar kásiporyndary túlekterdi jumysqa qabyldaýǵa daiyn. Mysaly, «QazAtomProm» ulttyq kompaniiasy 11 jas mamandy, «Gejýba Shieli Tsement» seriktestigi 8 adamdy jumysqa qabyldaýdy josparlap otyrsa, «SKZ-U» kúkirt qyshqyl zaýyty, Qyzylordanyń kishitonajdy munai óńdeý zaýyty, «Kristall menedjment» jáne basqa da iri kásiporyndar túlekterdi jumysqa alýǵa nietti. Birqatar túlekter memlekettik qyzmettiń kadrlyq rezervine alynatyn bolady», - dedi oblys ákimi.
Ústimizdegi jyldan bastap M.V. Lomonosov atyndaǵy Máskeý memlekettik ýniversitetiniń «Kiberqaýipsizdik» jáne «Protsesterdi matematikalyq modeldeý» mamandyqtary boiynsha oblys jastaryna magistratýrada oqý úshin 20 grant bóledi.
Sonymen birge, jyl saiyn Qazannyń «Innopolis» ýniversitetimen qyzylordalyq balalardy oqytý týraly kelisim jasaldy. Máskeýdegi «Skolkovo» innovatsiialyq ortalyǵymen yntymaqtastyq ornatylýda.
Buǵan qosymsha ústimizdegi jyldyń shilde aiynyń basynda oblys ákimdigi Astanada EvraAzES-tiń parlamentaralyq Assambleiasy janyndaǵy ýniversitetpen yntymaqtastyq týraly memorandýmǵa qol qoidy. Onyń quramyna 3 institýt, 4 fakýltet, 17 kafedra kiredi. Joǵary oqý ornynyń negizgi mamandyqtary - «Iýrisprýdentsiia», «Servis», «Týrizm», «Ekonomika», «Menedjment», «Keden isi», «Jarnama jáne jurtshylyqpen bailanys», «Konfliktologiia», «Dizain», «Dekorativti qolóner jáne halyqtyq kásipshilik», «Saýda isi», «Psihologiia».
«Ýniversitet jyl saiyn oqýǵa túsý emtihandaryn sátti tapsyrǵan Qyzylorda oblysynyń túlekterine 10 bilim grantyn bóletin bolady. Qazir – suranysqa ie kadrlardy daiyndaý zamany. Bizdiń órenderimiz bilim alatyn ýniversitettiń jańa baǵyttarynyń biri - biznes-informatika. Osy mamandyq aiasynda tsifrly ekonomikanyń damýy kezinde mańyzdy bolyp otyrǵan blokchein jáne kriptovaliýtany meńgeretin bolady», - dedi aimaq basshysy.
Atap óteiik, Ulttyq biryńǵai testileý boiynsha aimaqtyń ortasha ball kórsetkishi 85,82-ni kórsetti, bul byltyrǵy (84,2) kórsetkishpen salystyrǵanda 3,5 balǵa joǵary. Birneshe jyldan beri Qyzylorda oblysy UBT kórsetkishteri boiynsha aldyńǵy bes oblystyń qataryna kiredi.
