Ekologiia, geologiia jáne tabiǵi resýrstar ministri Maǵzum Myrzaǵaliev jumys saparymen Mańǵystaý oblysyna keldi, dep habarlaidy "Ult aqparat".
Is-sapar barysynda ol oblystyq ekologiialyq depertament mamandarymen kezdesip, birqatar qyzmetkerlerdi vedomstvolyq Qurmet gramotasymen marapattady.
Departamentke paidalanýǵa berilgen atmosferalyq aýa sapasyn áýeden onlain baqylaityn portativti gazoanalizatorly pilotsyz apparatpen tanysty. Aldaǵy ýaqytta basqa óńirlerde de aýany lastaýshy óndiris oryndaryn jedel anyqtaý úshin osyndai quraldar alynbaq.
Maǵzum Myrzaǵalievtiń sózinshe, itbalyqty emdeý jumysy úshin tiisti mamandar daiarlaý máselesin de jolǵa qoiý qajet.
«Kaspii itbalyqtaryn zertteý jáne qalpyna keltirý ortalyǵyna bardym. Munda jaraqat alǵan, aýyrǵan sý sútqorektilerin emdep, meken etý ortasyna qaita jiberedi. Ministrlik óz tarapynan ortalyqty keńeitý, jabdyqtandyrý jumysyna qoldaý kórsetýge daiyn. Biz úshin árbir itbalyqtyń ómiri qymbat», - dep jazdy ministr Twitter paraqshasynda.
Maǵzum Myrzaǵaliev ekologiialyq departament ókilderimen jáne «Qazgidromet» RMK, oblystyq aýmaqtyq orman sharýashylyǵy jáne ósimdikter álemi inspektsiia mamandarymen jinalys ótkizip, ekologiia, tabiǵatty qorǵaý máselelerinde jergilikti halyqpen keri bailanysty kúsheitýge tapsyrma berdi.
Ministr, sonymen birge, «Qazazot» JShS ónerkásip ornyn, Caspian Riviera balyq sharýashylyǵy mekemesin aralap kórdi. Qazazot basshylyǵymen kezdesý barysynda zaýyttyń atmosferalyq aýaǵa shyǵaryndylary kólemin azaitý máselesi talqylandy.
Sonda-aq, Ekologiia ministri Kaspii itbalyqtaryn zertteý jáne qalpyna keltirý ortalyǵynyń jumysymen de tanysty. Aita keteiik, ortalyq veterinarlary jaqynda Qyzyl kitapqa engen sý sútqorektileri jaraqattanyp, jaǵaǵa shyǵyp qalǵanda alǵashqy kómek kórsetip, qutqarý jumysymen ainalysady.
«Jalpy, Qyzyl kitaptaǵy itbalyqty uryp-soǵý jaǵdaiy budan keiin qaitalanbaýy tiis. Sondyqtan keleshekte bizdiń mamandarymyz eriktilerdi tartyp, oqý kýrstaryn ótkizbek»,- dedi ministr.
