Qazaqstan Respýblikasy Memlekettik qyzmet isteri agenttiginiń Mańǵystaý oblysy boiynsha departamentiniń ókilderi Jańaózen qalasynyń ákimi Maqsat Ibaǵarovtyń Ádep kodeksi normalaryn buzbaǵanyn aitty, dep habarlaidy "Ult aqparat".
18 qyrkúiekte Facebook áleýmettik jelisinde túngi ýaqytta Aqtaý qalasyndaǵy «Tofu» kafesi mańynda Mańǵystaý oblysy ákimdiginiń is basqarmasy kommýnaldyq memlekettik mekemesine qarasty memlekettik nómeri R106RK12 markaly qyzmettik kóliktiń júrgeni jáne sol jerde Jańaózen qalasynyń ákimi Maqsat Ibaǵarovtyń bolǵany týraly jazba jariialanǵan edi.
Osyǵan orai, 20 qyrkúiek kúni Mańǵystaý oblysy ákiminiń atyna usynys hat joldanyp, oryn alǵan kemshilikti boldyrmaý, sondai-aq osy oqiǵa boiynsha mán-jaidy anyqtaý maqsatynda qyzmettik tergep-tekserý júrgizip, tiisti tulǵalardyń jaýapkershiligin qaraý usynyldy. Mańǵystaý oblysy ákiminiń apparaty atalǵan usynys hat negizinde mán-jaidy habarlady.
Atap aitqanda, memlekettik tirkeý nómiri R106 RK12 «Toyota Land Cruiser» markaly qyzmettik avtokólik 17 qyrkúiekte senimhat boiynsha Jańaózen qalasy ákiminiń apparatynyń ókili S.Qasyqbaevqa akti negizinde tapsyrylǵan. Al Jańaózen qalasynyń ákimi M.Ibaǵarov 17-18 qyrkúiekte Nur-Sultan qalasynda issaparda bolǵan.
Osy derekke qatysty qala ákimi M. Ibaǵarov óz túsiniktemesinde 18 qyrkúiekte is-sapardan kelgen kezinde áýejaidan atalǵan qyzmettik kólik kútip alǵanyn aitqan. Ol Jańaózen qalasyna deiin jol uzaq bolǵandyqtan tamaq ishýge Aqtaý qalasyndaǵy shaǵyn kafege kirgen. Sol jerde jol-patrýl politsiia qyzmetkerleri jumystan tys ýaqytta júrýge bolmaitynyn túsindirip, kólikti aiyp turaǵyna alyp ketken.
Bul oraida qyzmettik avtokólik Jańaózen qalasy ákimi apparatynyń balansyna ótkendikten sol mekeme júrgizýshisiniń atyna jol paraǵy berilýi tiis bolatyn. Alaida avtokólikti tiisti jol qujattary memlekettik mekemeniń atynan rásimdelmegen kúii áýejaiǵa shyǵyp ketip, qujattarynyń tolyq bolmaǵandyqtan aiyppul turaǵyna jabylǵan.
Osyǵan orai, apparat basshysynyń buiryǵyna sáikes, avtokólik qujattaryn tolyq rásimdemegeni úshin qyzmetshi S.Qasyqbaevqa eskertý túrinde tártiptik jaza qoldanylǵan.
Nátijesinde Jańaózen qalasynyń ákimi M.Ibaǵarovtyń tarapynan Ádep kodeksi normalaryn buzý deregi anyqtalmaǵan degen qorytyndy shyqty.
Eske sala keteiik, osyǵan deiin Jańaózen qalasy ákiminiń qyzmet kóligi aiyp turaǵyna qoiylǵanyn habarlaǵan edik.
