Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine ónerkásiptik qaýipsizdik, indýstriialyq aimaqtar, janýarlar dúniesi, erekshe qorǵalatyn tabiǵi aýmaqtar, energetika, tabiǵi monopoliialar jáne ishki ister organdary qyzmetkerlerine turǵyn úi tólemderi máseleleri boiynsha ózgerister men tolyqtyrýlar engizý týraly» zań jobasy qaraldy.
Qujatqa tolyqtyrý engizilgendikten, zań jobasy Májiliske qaitaryldy, dep habarlaidy QazAqparat tilshisi.
Zań jobasynyń maqsaty - ónerkásiptik qaýipsizdik, indýstriialyq aimaqtar, janýarlar dúniesi, erekshe qorǵalatyn tabiǵi aýmaqtar, energetika, tabiǵi monopoliialar jáne turǵyn úi qatynastary salasynda zańnamalyq aktilerdi odan ári jetildirý.
Atap aitqanda, Senat depýtattary qyzmet babynda qaza tapqan politsiia qyzmetkerleriniń otbasyna turǵyn úi járdemaqysyn tóleýdi usyndy. Qyzmet barysynda qaza tapqan nemese jaraqat alǵan politsiia qyzmetkerleriniń otbasylary endi baspana tólemderin alýdy jalǵastyra beredi. Senatorlar búgin Zań jobasyna osyndai túzetý engizip, ony Májiliske qaitardy.
Bul tarmaq buryn rettelmegen bolatyn. Iaǵni eger politsei qyzmet kezinde jaraqat alyp, ne qaitys bolsa turǵyn úi járdemaqysy toqtatylatyn. Bul politsei men onyń otbasynyń onsyz da kúrdeli jaǵdaiyn edáýir qiyndatady. Senatorlar saqshylar otbasy osyndai jaǵdaiǵa dýshar bolǵan kezde belgilengen tólemderdi ipoteka merzimi aiaqtalǵanǵa deiin nemese jaldamaly turǵyn úi tolyq satyp alynǵanǵa deiin saqtap qaldyrý týraly usynys aitty.
«Bas komitet qyzmettik mindetterin oryndaý kezinde aýyr jaǵdaiǵa tap bolǵan: jaraqat alǵan, bir jerin syndyrǵan nemese kontýziia alǵan ishki ister organdarynyń qyzmetkerlerin, sondai-aq qaza tapqan qyzmetkerdiń otbasy múshelerin áleýmettik qorǵaýǵa arnalǵan túzetýler usynyp otyr. Onda, atap aitqanda, ipotekalyq shart nemese keiinnen satyp alynatyn turǵyn úidi jaldaý sharty boiynsha mindettemeler oryndalǵanǵa deiin buryn belgilengen turǵyn úi tólemderin Úkimet belgilegen mólsher men tártipte saqtaý usynylady», - dep atap ótti senator Sergei Ershov óz baiandamasynda.
