Ógei shesheden qorlyq kórgen apaly-sińlili jetisailyq oqýshy qyzdar aýrýhanadan shyǵarylyp, Shymkent qalasyndaǵy kámeletke tolmaǵandardy beiimdeý ortalyǵyna ornalastyryldy. Sondai-aq ógei shesheniń bir jarym jasar týǵan balasy da otbasynan alastatylyp, bóbekter úiine jiberildi.
Aýrýhanada emdelip jatqan jetisailyq úsh qyz 20 sáýirde aýrýhanadan shyqty. Biraq olar úiine jiberilmedi.
"Jetisai aýdanynyń kámeletke tolmaǵandar isi jáne olardyń quqyǵyn qorǵaý jónindegi komissiianyń 2019 jylǵy 18 sáýirdegi sheshimi boiynsha olar Shymkenttegi kámeletke tolmaǵandardy beiimdeý ortalyǵyna ornalastyryldy. Budan bólek, osy otbasyndaǵy bir jarym jasar sábi Shymkent qalasy densaýlyq saqtaý basqarmasynyń "Mamandandyrylǵan bóbekter úii" kommýnaldyq memlekettik mekemesine jiberildi", - dep habarlaidy "Otyrar" jergilikti telearnasy.
Isti bolyp jatqan áiel sot sheshimimen júktiligine bailanysty úi qamaýyna aýystyrylǵan.
Tergeý amaldary jalǵasyp jatyr. Jasóspirimderge bilikti psihologiialyq kómek kórsetilýde. Bul isti oblys prokýrory baqylaýǵa alǵan.
Ógei shesheniń qorlyǵy
Jetisai aýdanynyń quqyq qorǵaý organdary ógei ananyń jaǵa ustatarlyq áreketi týraly 11 sáýirde bilgen. 6, 7 jáne 9-synyp oqýshylarynyń kórgen qorlyǵy týraly quzyretti organǵa muǵalimder habarlaǵan.
12 sáýirde tekseris júrgizilip, politsiia úsh qyzdyń ákesine qatysty qylmystyq kodekstiń 140-baby "Kámeletke tolmaǵan balalardy tárbieleý jónindegi mindetterdi oryndamaý" boiynsha jáne q 110-baby "Azaptaý" boiynsha ógei ananyń ústinen qylmystyq is qozǵady.
Belgili bolǵandai, er adam qyzdaryn azaptaǵan áielmen zańdy nekede tirkelmegen, ekeýi úsh jyldan beri birge turyp jatqan.
28 jastaǵy jetisailyq áieldiń ógei qyzdaryn azaptaý tásilderin dápterge jazyp otyrǵany belgili boldy. Saý-tamtyǵy joq qyzdardyń denesinen tisteýiktiń, pyshaqtyń, ineniń izderi tabylǵan. Ógei shesheniń odan bólek te adam tózgisiz azaptaýlaryn bastan keshken qyzdar "ákemiz taǵy da aýyryp qalmasa eken" degen nietpen oǵan kóndigip kelgenderin aitqan.
Kimder jazalanady?
Balalarǵa qatysty zorlyq-zombylyqty ýaqytyly anyqtaý boiynsha jetkiliksiz jumys jasaǵany úshin aýdan ákiminiń orynbasary, aýdandyq bilim bóliminiń jetekshisi, mektep direktory, mektep direktorynyń tárbie isi jónindegi orynbasary, mektep psihologtary, áleýmettik pedagog jáne 3 synyp jetekshisine qatysty qatań tártiptik jaza qoldanylady.
Búkil eldi shýlatqan isti eldiń bas prokýratýrasy óz baqylaýyna aldy. Sondai-aq, bala quqyqtary jónindegi ýákil Sáýle Aitpaeva men bilim jáne ǵylym ministrligi bala quqyǵyn qorǵaý komitetiniń baqylaýynda.
