Qyz zorlady degen aiyppen 5 jylǵa sottalǵan bloger Dýman Erqanat aqtalyp shyqty. Alaida jábirlenýshi sheshimmen kelispei, Joǵarǵy sotqa shaǵymdanýǵa nietti, dep habarlaidy "Ult aqparat" Stan.kz aqparat agenttigine silteme jasap.
2023 jyly 13 qyrkúiekte qarjy saýatyn úiretetin bloger qyzdy zorlaǵany úshin 5 jylǵa bas bostandyǵynan aiyryldy. Alaida ol sheshimmen kelispei, apelliatsiialyq sotqa shaǵymdanǵan.
23 qańtarda sot alqasy Dýman Erqanatty kinásiz dep tanyp, aqtady. Sot alqasynyń quramynda E.Dáýliev, S.Sákenov jáne B.Burymqulov bolǵan. Jábirlenýshi bul sheshimdi negizsiz dep sanaidy jáne ádildikti talap etedi. Qyzdyń aitýynsha, sot alqasy onyń dálelderin elemei, sot etikasyn buzyp, oǵan qysym kórsetken jáne namysyna tigen.
“Olar birinshi satydaǵy sotta blogerdiń óz kinásin moiyndap, ókingenin eskergen joq. Tipti meni sotta “tájiribeli áiel” dep qorlap, qoldanystaǵy meniń qorǵaný quqyǵymdy buzdy. “Nege zorlamaq bolǵan kezde qarsylasyp, ony uryp, tyrnamadyń?” dep suraqtyń astyna aldy. Biraq men 45 keli ǵanamyn, men oǵan qalai qarsy turamyn?! Álde sýdialar qurbandardyń barlyǵy birdei áreket etýi kerek dep eseptei me?”, – dedi qyz.
Ol sotqa deiingi protseste blogerdiń Qyrǵyzstanǵa qashyp ketpek bolǵany da elenbegenine narazy. Aitýynsha, sýdia “munyń esh qatysy joq” degen.
Jábirlenýshiniń sózinshe, sot otyrysynda sot alqasy qyzdyń jekesine ótip, taqyryptan aýytqyǵan kórinedi.
“Sot alqasy qazaq bola tura qazaqsha sóilemegenim úshin meni synnyń astyna aldy. Aýdarmashyny qajet etsem de, ótinishimdi elemedi, tek ózderi oryssha aityp turdy. Buǵan sottalýshynyń advokaty áser etse kerek. Sebebi ol ózi buryn sot júiesinde jumys istegendikten, sýdialarmen jaqsy qarym-qatynasta. Artynan Dýman Erqanat jazadan sytylyp, osy isin jalǵastyrsa, maǵan qaitadan shabýyl jasasa, buǵan kim jaýap beredi? Burynǵy ádetine qaita salyp, basqa qyzǵa tiisse she?”, – dedi ol.
Apelliatsiialyq sot úkimi boiynsha Dýman Erqanatty birinshi satydaǵy sot óz kinásin moiyndaǵany úshin sottap jibergen. Alaida qyzdyń zorlanǵany týraly aiǵaq jetkiliksiz dep tanypty. Mundai sheshimge ne áser etkenin sot alqasy bylai dep túsindirgen.
“Ol zorlaný barysynda aiqyn qarsylyq kórsetpegen, sebebi D.Erqanattan dene jaraqattary anyqtalmady. Zattai dáleldemelerdi zertteý hattamasy boiynsha onyń kiimi jyrtylmaǵan. Dýman Erqanatqa qatysty Bostandyq aýdany №2 aýdandyq sotynyń 2023 jylǵy 13 qyrkúiektegi úkimi joiylsyn, is boiynsha jańadan aqtaý úkimi qabyldansyn. Dýman Erqanatqa qatysty qamaýǵa alý túrindegi bultartpaý sharasynyń kúshi joiylsyn, dereý qamaýdan bosatylsyn”, – delingen sot úkiminde.
Buǵan deiin jábirlenýshi qarjy saýatyn úiretetin blogerden zorlyq kórdim dep redaktsiiamyzdan kómek suraǵan. Sottyń birinshi instantsiiasy boiynsha bloger qyzdy zorlaǵany úshin sottalyp, jábirlenýshige talap aryzy úshin 3 million 117 myń teńge tóleýge mindetteldi jáne bes jylǵa bas bostandyǵynan aiyrylǵan edi. Qyz apelliatsiia barysynda sheshimge bireýler áser etip ketedi dep qoryqty.
