Foto: ashyq derekkóz
Qazaq kinosyna qatysty daýǵa ainalǵan qamzol máselesine aktrisa Merýert Ótekesheva pikir bildirdi. Óner iesi qoǵamdaǵy qyzý talqylaýdyń baǵytyna kúmán keltirip otyr, dep habarlaidy Ult.kz.
Qazaq kino ónerine qatysty daý týdyrǵan qamzol tóńiregindegi pikirtalasqa tanymal aktrisa Merýert Ótekesheva aralasty. Onyń aitýynsha, qoǵamda sóz bolyp júrgen qamzol – túpnusqa buiym.
Jýrnalist Gúlbaný Ábenovamen suhbat barysynda aktrisa keńestik kezeńde túsirilgen filmderdegi kóptegen rekvizitter men kostiýmderdiń túrli sebeppen jan-jaqqa tarap ketkenin aitty. Qazirgi ýaqytta mundai tarihi jádigerlerdiń bir bóligi jeke adamdardyń qolynda saqtaýly.
Aktrisanyń sózinshe, mýzeide tek bir ǵana nusqa bar, alaida onyń ózi tiisti deńgeide kútilmei otyr. Osy jait óner murasyna degen kózqarastyń júieli emestigin kórsetedi.
Merýert Ótekesheva bul másele tóńiregindegi daýdyń shekten tys ýshyǵýyn quptamaitynyn jetkizdi. Onyń pikirinshe, qoǵam nazary eń aldymen ónerdiń ózine, sol dáýirdiń tiri kýágerlerine aýdarylýy tiis. Aktrisa atalǵan filmge túsken áriptesteriniń ishinde kózi tiri jalǵyz ózi ekenin atap ótti.
Óz kezeginde jýrnalist Gúlbaný Ábenova áleýmettik jelidegi jazbasynda mádeni murany júieleý máselesin kóterdi. Onyń pikirinshe, mádeniet salasyna jaýapty organdar kino rekvizitteri men kostiýmderin jinaqtap, memleket qaraýyna alý bastamasyn qolǵa alýy kerek.
Buǵan deiin atalǵan qamzoldyń Baian Maqsatqyzynyń qolynda bolýy qoǵamda túrli pikir týǵyzǵan edi. Bul jaǵdai kino murasynyń saqtalýy men menshik máselesin qaita kún tártibine shyǵardy.
