فوتو: اشىق دەرەككٶز
قازاق كينوسىنا قاتىستى داۋعا اينالعان قامزول مەسەلەسٸنە اكتريسا مەرۋەرت ٶتەكەشەۆا پٸكٸر بٸلدٸردٸ. ٶنەر يەسٸ قوعامداعى قىزۋ تالقىلاۋدىڭ باعىتىنا كٷمەن كەلتٸرٸپ وتىر, دەپ حابارلايدى Ult.kz.
قازاق كينو ٶنەرٸنە قاتىستى داۋ تۋدىرعان قامزول تٶڭٸرەگٸندەگٸ پٸكٸرتالاسقا تانىمال اكتريسا مەرۋەرت ٶتەكەشەۆا ارالاستى. ونىڭ ايتۋىنشا, قوعامدا سٶز بولىپ جٷرگەن قامزول – تٷپنۇسقا بۇيىم.
جۋرناليست گٷلبانۋ ەبەنوۆامەن سۇحبات بارىسىندا اكتريسا كەڭەستٸك كەزەڭدە تٷسٸرٸلگەن فيلمدەردەگٸ كٶپتەگەن رەكۆيزيتتەر مەن كوستيۋمدەردٸڭ تٷرلٸ سەبەپپەن جان-جاققا تاراپ كەتكەنٸن ايتتى. قازٸرگٸ ۋاقىتتا مۇنداي تاريحي جەدٸگەرلەردٸڭ بٸر بٶلٸگٸ جەكە ادامداردىڭ قولىندا ساقتاۋلى.
اكتريسانىڭ سٶزٸنشە, مۋزەيدە تەك بٸر عانا نۇسقا بار, الايدا ونىڭ ٶزٸ تيٸستٸ دەڭگەيدە كٷتٸلمەي وتىر. وسى جايت ٶنەر مۇراسىنا دەگەن كٶزقاراستىڭ جٷيەلٸ ەمەستٸگٸن كٶرسەتەدٸ.
مەرۋەرت ٶتەكەشەۆا بۇل مەسەلە تٶڭٸرەگٸندەگٸ داۋدىڭ شەكتەن تىس ۋشىعۋىن قۇپتامايتىنىن جەتكٸزدٸ. ونىڭ پٸكٸرٸنشە, قوعام نازارى ەڭ الدىمەن ٶنەردٸڭ ٶزٸنە, سول دەۋٸردٸڭ تٸرٸ كۋەگەرلەرٸنە اۋدارىلۋى تيٸس. اكتريسا اتالعان فيلمگە تٷسكەن ەرٸپتەستەرٸنٸڭ ٸشٸندە كٶزٸ تٸرٸ جالعىز ٶزٸ ەكەنٸن اتاپ ٶتتٸ.
ٶز كەزەگٸندە جۋرناليست گٷلبانۋ ەبەنوۆا ەلەۋمەتتٸك جەلٸدەگٸ جازباسىندا مەدەني مۇرانى جٷيەلەۋ مەسەلەسٸن كٶتەردٸ. ونىڭ پٸكٸرٸنشە, مەدەنيەت سالاسىنا جاۋاپتى ورگاندار كينو رەكۆيزيتتەرٸ مەن كوستيۋمدەرٸن جيناقتاپ, مەملەكەت قاراۋىنا الۋ باستاماسىن قولعا الۋى كەرەك.
بۇعان دەيٸن اتالعان قامزولدىڭ بايان ماقساتقىزىنىڭ قولىندا بولۋى قوعامدا تٷرلٸ پٸكٸر تۋعىزعان ەدٸ. بۇل جاعداي كينو مۇراسىنىڭ ساقتالۋى مەن مەنشٸك مەسەلەسٸن قايتا كٷن تەرتٸبٸنە شىعاردى.
