Almaty oblysynda Qytaimen shekaradaǵy «Nur Joly» kedendik jáne shekaralyq baqylaý beketinde 58 shaqyrymdyq kólik keptelisi qalyptasty, dep habarlaidy "Ult aqparat".
Ótkizý-baqylaý beketindegi kúrdeli jaǵdaidy sheshý jáne mundaǵy quqyqtyq tártipti retteý úshin Panfilov aýdany ákimdiginde jedel shtab quryldy.
«Pandemiiaǵa bailanysty Qytai Halyq Respýblikasy ózge elderden qabyldaityn kólik sanyn qysqartty. Sonyń saldarynan ótkizý beketinde júk avtokólikteriniń keptelisi oryn aldy. Búgingi tańda onyń uzyndyǵy 58 shaqyrymdy qurady, jalpy sany – 2 myń 366 júk kóligi.
Aýdan ákimi tez arada jedel shtab qurdy. Shtabqa keden qyzmeti, shekara qyzmeti, politsiia bólimi, sondai-aq júrgizýshiler quramynan belsendiler engizildi. Bul jerde atalǵan ótkizý beketindegi problemalar talqylanady jáne sheshiledi.
Jedel shtabtyń kúndelikti otyrystary barysynda qalyptasqan jaǵdai turaqtaldy. Atalǵan ýchaskede qoǵamdyq tártipti buzý, jol-kólik oqiǵalary tirkelgen joq. Sonymen qatar, júrgizýshilermen zań talaptaryn múltiksiz saqtaý jáne usaq quqyq buzýshylyqtarǵa jol bermeý týraly quqyqtyq túsindirý jumystary turaqty túrde júrgizilýde», - dedi Almaty oblysy Panfilov aýdandyq politsiia bólimi bastyǵynyń birinshi orynbasary Jandos Kavliev.
Sonymen qatar, jedel shtabtyń belsendi jumysy jáne júk kólikteriniń júrgizýshilerimen tyǵyz qarym-qatynas nátijesinde ótkizý beketinen jedel ótý úshin óz qyzmetterin usynatyn deldaldardyń zańsyz áreketteri áshkere bolǵan.
«Júrgizýshilerdiń ózderi jalpy kezekti «ainalma jolmen» ótýdi qalap, suranys týdyrmaǵany abzal. Qazirdiń ózinde deldaldar qatarynan birneshe adam jaýapkershilikke tartyldy. Sonymen qatar, patrýldik politsiia jasaqtary «Nur Joly» beketiniń mańynda jol qaýipsizdigin qamtamasyz etý barysynda jol qozǵalysy erejelerin óreskel buzý derekterin anyqtady. Quqyq buzýshylarǵa ákimshilik zańnama talaptaryna sáikes sharalar qabyldandy. Bul jerdegi jaǵdai turaqtandy jáne baqylaýda», - dedi podpolkovnik Kavliev.
