Qytaida Aqjarqyn Turlybaiǵa qatysty aiyptaý úkimi shyqqan jaǵdaida, Qazaqstan tarapy onyń jazasyn elimiz aýmaǵynda óteýi boiynsha saýal joldaidy. Bul týraly QR Bas prokýrorynyń orynbasary Marat Ahmetjanov málim etti, dep habarlaidy "Ult aqparat".
«Búginde ol úkimge shaǵym túsirý kezeńinde. Atap aitqanda, Qytaimen arada bizde sottalǵandardy berý týraly ekijaqty kelisim bar. Endi qytailyq sot tóreliginiń sońǵy kesimin kútemiz. Eger de aqtaý úkimi shyqsa, onda óte jaqsy bolar edi», - dedi M. Ahmetjanov Parlament Májilisinde tilshiler saýalyna jaýap bere otyryp.
QR Bas prokýrory orynbasarynyń sózine qaraǵanda, eger A. Turlybai sotty bolsa, onda ol tiisti ótinish jasaýǵa quqyly. Osynyń negizinde QR Bas prokýratýrasy onyń jazasyn óteý merzimin Qazaqstan aýmaǵynda jalǵastyrýǵa bailanysty qujatty joldaityn bolady.
Eske sala keteiik, 21 jastaǵy qazaq qyzy Aqjarqyn Turlybai 2014 jyldyń naýryz aiynda Qytaidyń Malaiziiamen shekarasynda esirtkimen ustalǵan bolatyn. Onyń júk sómkesinen 4,5 keli esirtki tabyldy, Aqjarqyn ol týraly bilmeitinin málimdegen. Osy is boiynsha Qytaidyń Gýanchjoý soty Aqjarqyn Turlybaidy esirtki kontrabandasymen aiyptap, ómir boiyna bas bostandyǵynan aiyrdy. 2016 jyly 7 sáýirde apelliatsiialyq satydaǵy sot Aqjarqyn Turlybaidy ómir boiyna bas bostandyǵynan aiyrý jazasyn ózgertý jáne isti birinshi satydaǵy sottyń qaraýyna jiberý týraly qaýly etken bolatyn.
Jaqynda Qazaqstan Prezidenti Qasym-Jomart Toqaev Qytaiǵa memlekettik sapary barysynda osy el túrmesinde jatqan otandasymyz Aqjarqyn Turlybaidyń máselesin kóterdi.
