Qytai-Mianma shekarasyna jaqyn ornalasqan Jýili qalasynyń biligi koronavirýstyń «delta» shtamy taralýyna bailanysty lokdaýn jariialady, dep habarlaidy QazAqparat.
Jýili qalasynyń (Iýnnan provintsiiasy, Ońtústik-Batys Qytai) ákimshiligi osy aptada qalaǵa kirip-shyǵatyn barlyq joldy jaýyp, úide oqshaýlaný rejimin engizdi.
Qatań karantin sharalary engizildi, kommertsiialyq kásiporyndar men memlekettik mekemeler, mektepter men tehnikýmdar jabyldy. Sýpermarketter men dárihanalardyń jumysy toqtatyldy. Jergilikti turǵyndarǵa úide oqshaýlanýǵa sheshim qabyldandy, azyq-túlikter úige jetkiziletin bolady.
Jýili qalasynda jáne onyń mańyndaǵy eldimekenderde koronavirýs juqtyrý jaǵdailarynyń kópshiligi «syrttan ákelingen». Jýilide Mianmamen transshekaralyq saýda júrgiziledi. Osyǵan bailanysty bilik shekaralyq baqylaý sharalaryn kúsheitti.
Mianmamen shekaralas Qytaidyń Jýili qalasynda koronavirýstyń órshýi osymen tórtinshi ret bolyp otyr, sońǵysy osy jyldyń naýryz aiynda bolǵan edi. Úshinshi ret Jýili qalasynda koronavirýstyń taralýyna bailanysty tolyq lokdaýn engizildi.
Juma kúni Qytaidyń Densaýlyq saqtaý isteri jónindegi memlekettik komitetiniń habarlaýynsha, ótken táýlikte materiktik Qytaida koronavirýsty jergilikti juqtyrýdyń 8 jańa jaǵdaiy anyqtaldy, barlyǵy Iýnnan provintsiiasynan.
