25 qańtar kúni belgili jazýshy, aqyn, synshy Ábdenbai Bajai Qabaiuly 80 jasqa qaraǵan shaǵynda Qytai Halyq Respýblikasy Shyńjań ólkesiniń ortalyǵy Úrimji qalasynda dúnieden ozdy, dep habarlaidy "Ult aqparat".
Ábdenbai Bajai 1939 jyly QHR Shyńjań ólkesi Altai aimaǵynda dúniege kelgen. 1959 jyly Úrimji qalasyndaǵy Shyńjań til institýtynyń Qytai tili jáne ádebieti fakýltetinde oqyǵan.
Ol sanaly ǵumyrynda shyǵarmashylyqpen qatar, oqytýshy, «Altai» gazetiniń redaktory, Shyńjań ólkesindegi Jazýshylar odaǵynyń qazaq tilinde jaryq kóretin «Shuǵyla» jýrnalynda bas redaktordyń orynbasary sekildi qoǵamdyq jumystardy atqarǵan. Ábdenbai Bajai Ile Qazaq avtonomiialyq oblysynyń Jazýshylar qoǵamy tóraǵasynyń orynbasary, Qytai jazýshylar qoǵamynyń múshesi, «Memlekettik birinshi dárejeli jazýshy» ataǵynyń iegeri boldy.
«Súrleý», «Taý bulaǵy», «Bógeý bermes», «Aqiqat izdegen adam» jyr jinaqtarynyń jáne «Kún óz keýdeńnen týady», «Jasampazdyq orbitasy», «Ádebiet jáne tanym» kitaptarynyń avtory. Shyǵarmalary qytai, uiǵyr, qyrǵyz tilderine aýdarylǵan. Sonymen birge aqyn óleńderi «Qazaq ádebieti», «Juldyz» sekildi Qazaqstanda shyǵatyn basylymdarda jaryq kórip, oqyrmandarmen qaýyshqan.
