Qytaidyń shyǵysyndaǵy portty qala - Tsindao qalasynyń biligi osy apta aiaǵyna deiin 9 mln turǵynynyń bárin koronavirýs testinen ótkizetinin málimdedi. Bilik sońǵy eki aiǵa jýyq ýaqyt ishinde alǵash ret koronavirýs infektsiiasy anyqtalǵanyn aityp otyr. Alaida sarapshylar aýrý belgisi baiqalmaǵan naýqastardy Covid statistikasyna qospaityn Qytaidyń resmi oryndary bergen málimetke kúmánmen qaraidy.
12 qazanda Qytai biligi Tsindao qalasynda 12 adamnan koronavirýs infektsiiasy anyqtalǵanyn habarlady. Resmi málimet boiynsha, qalaǵa virýs syrttan kelgen. Tsindao ákimshiligi pýlmonologiialyq klinika men ortalyq aýrýhananyń jedel járdem bólimin japqanyn habarlady. Koronavirýs juqtyrǵandar emdeletin aýrýhana ǵimaraty da qaýipsizdik maqsatynda jabylǵan.
Byltyr jyl sońynda alǵash ret koronavirýs tabylyp, virýs oshaǵyna ainalǵan Ýhan qalasynyń biligi osyǵan deiin qala turǵyndaryn tutas koronavirýs testinen ótkizgenin habarlaǵan bolatyn. Pekin men Úrimjide de milliondaǵan adam testen ótken.
Jappai testileý sharasy Qytaida virýstyń taraýyn báseńdetýge kómektesip, kóp jaǵdaida qalypty ómirge oralýǵa septesken. Qazan aiynyń basynda ondaǵan million adam "Altyn apta" ulttyq merekesin toilap, el aýmaǵynda erkin qozǵalǵan.
