Densaýlyq saqtaý ministri Eljan Birtanov Qytaida koronavirýs infektsiiasyn juqtyrǵan 52 myń adam emdelip, aýrýhanadan shyqqanyn málim etti, dep habarlaidy QazAqparat.
«Koronavirýsqa qatysty kúndelikti aqparattardy ýaqtyly berip jatyrmyz. Ókinishke qarai, soǵan qaramastan halyq arasynda, áleýmettik jelilerden ártúrli málimetter kelýde. Mysaly búgin ýatsapta «Nur-Sultanda eki Qytai azamaty qaitys boldy» degen, keshe «Almatyda aýrý Qytai azamattary emdelip jatyr» degen de jalǵan aqparat tarady. Óńirlerden de osyndai aqparat kelip jatyr. Bizdiń negizgi mindetimiz – elimizdegi túrli aýrýdan, infektsiiadan qorǵaý, ashyq ári tolyq aqparat berý», - dedi ministr OKQ-da ótken baspasóz máslihatynda.
Eljan Birtanov koronavirýs boiynsha qazirgi álemdegi ahýal týraly da málimettermen bólisti.
«Qytaida 80 myńnan astam naýqas tirkeldi. Sońǵy kúnde 0,18 paiyz qosymsha ósimmen naýqastardyń tirkelgeni belgili bolyp otyr. Biraq aýrýhanalardan shyqqan azamattardyń sany 52 myńnan asty. Iaǵni búkil naýqastyń 65 paiyzy emdelip shyqty. Ókinishke qarai dúnie júzindegi 79 memlekette 14 myńnan astam naýqas tirkeldi. Qazirgi tańda Qazaqstanda koronavirýs infektsiiasymen naýqastanǵan adamdar tirkelmedi. Mundai diagnoz áli eshkimge qoiylǵan joq», - dedi ol.
Ministr óz sózinde 20 aqpannan bastap koronavirýs infektsiiasy boiynsha qaýipti memleketter úsh sanatqa bólingenin eske saldy.
«Osy sanattar boiynsha baqylaý jumystary júrgizilýde. A jáne B sanattary boiynsha 900-den astam azamat karantinge jatqyzyldy. Úshinshi sanattaǵy 7515 azamat baqylaýda. Jalpy túrli memleketten kelgen 8 myńǵa tarta azamat qazir bizdiń densaýlyq saqtaý ministrliginiń baqylaýynda. Aýrý bastalǵaly beri bizdiń arnaiy Ulttyq sarapshylyq laborotoriia úsh memleketten qajetti laborotorlyq testti aldy. Qazirgi kúni 11 myń adam tekseris testinen ótti. Barlyq test nátijesi jaqsy. Koronavirýs tabylmady», - dedi ol.
