Qytaidyń internet aqparattyq ortalyǵy jaqynda eldiń «Internetti damytý týraly statistikalyq esebin» jariialady.
Jariialanǵan aqparatta 2020 jyldyń jeltoqsan aiyndaǵy jaǵdai boiynsha Qytaida 989 million internet qoldanýshysy bar ekendigi kórsetilgen.
Statistika kórsetkendei, 2015 jyly Qytaida internet qoldanýshylar sany 688 million bolsa, 2020 jyly 989 millionǵa jetti. Bul elde 5 jyl ishinde internet qoldanýshylar sany 43,7 paiyzǵa artty.
Basqasha aitqanda, qazirgi álemde internet paidalanýshylardyń arasynda árbir besinshi adam - qytailyq degen sóz.
Qytai internet paidalanýshylar arasynda, aýyldyq paidalanýshylar sany barlyǵy 31,3% quraidy, shamamen 309 mln.
Baiandamada Qytaidyń aýyldyq aimaqtarynyń jartysyna jýyǵy (55,9%) internetke qol jetkize alatyndyǵy aityldy.
Qytailyq internet qoldanýshylardyń bilimi turǵysynan, olardyń 40%-y orta mektepti bitirý deńgeiine ie (9-synyp). Joǵarǵy orta mektepti (11 synyp) nemese kolledjdi bitirgen internetti paidalanýshylardyń sany shamamen 20% quraidy. Bastaýysh mektep nemese odan tómen bilimi barlar internet qoldanýshylar sanynyń 19% quraidy.
Basqasha aitqanda, bul eldegi internet paidalanýshylardyń shamamen 20% ǵana joǵary bilimdi.
Kásibi boiynsha internet paidalanýshylardyń 21%-y mektep oqýshylary, odan keiin 16,9%-y óz betinshe jumys jasaityndar / frilanserler, 8,0%-y aýyl, orman, mal sharýashylyǵy jáne balyq aýlaý salasynyń qyzmetkerleri.
Qytai úkimetiniń internetti buǵattaý saiasatyna bailanysty qytailyq internet qoldanýshylar basqa elderdiń internet qoldanýshylarymen ádettegidei bailanysqa túse almaidy, sondai-aq Facebook, YouTube jáne Twitter siiaqty halyqaralyq áleýmettik jelilerge kire almaidy. Osyǵan qaramastan, qytailyq buqaralyq aqparat quraldary Qytai «álemdegi eń úlken sandyq qoǵamǵa ie» dep málimdeidi.
