13 aqpanda Qazaqstannyń charterlik ushaǵy Qytaidan 155 qazaqstandyqty Almatyǵa ákeledi, dep habarlaidy "Ult aqparat".
Bul týraly QR Syrtqy ister ministri Muhtar Tileýberdi QR Parlamenti Májilisinde aitty.
«10 aqpanda 217 azamatymyz elge jetkizilgen edi. Taǵy bir ushaǵymyz búgin keshke Qytaiǵa ushyp, taierteń 155 qazaqstandyqty Almatyǵa jetkizedi. Osy reisten keiin Qytaida 343 azamatymyz óz erkimen qalady, olar diplomatiialyq mekemelerdiń qyzmetkerleri jáne olardyń otbasy músheleri. Sonymen birge, stýdentter men óz sharýalarymen barǵan azamattar da bar. Olarmen bizdiń elshilik sóilesti, olar qaitýǵa niet bildirmedi», - dedi M. Tileýberdi.
Onyń aitýynsha, Qazaqstannyń Qytaidaǵy barlyq diplomatiialyq mekemeleri qalypty rejimde jumys istep tur. Tek konsýldyq bólimshelerdiń jumysyna shekteý qoiylǵan.
Sonymen birge, ministr búgin keshke Qytaiǵa jiberiletin ushaqta 220 oryn bar ekenin aitty. Sondyqtan, 155 jolaýshyǵa qosymsha elge qaitýǵa sheshim qabyldaǵan azamattardy da ala ketýge bolady. Olar úshin 65 oryn bos.
«Charterlik reisti QR Úkimeti uiymdastyrǵan. Barlyq jolaýshylar tegin jetkiziledi. «Eir Astana» kompaniiasynyń ushaǵy Almaty qalasyna ushyp keledi jáne jolaýshylar eki aptalyq karantinge ázirlengen arnaiy korpýsqa jatqyzylady. Nur-Sultandaǵy mundai karantindik oryndarda adam sany tolyq», - dedi ministr.
