2017 jyly Qytaimen birigip júzege asyryla bastaǵan CR929 keń korpýsty lainer qurastyrý jobasy Reseisiz jalǵasady. Bul jóninde The Air Current habarlady, dep jazady Azattyq.
Buǵan deiin Qytaidyń Reseidi óz naryǵyna jibergisi kelmeitini, qalǵan naryqtyń 70 paiyz úlesin ǵana qaldyrǵysy kelgendikten jobanyń taǵdyry belgisiz ekeni aitylǵan.
Resei óziniń bólshek óndirýshilerin usynǵan, alaida Qytai Eýropa men AQSh-qa ushý kezinde kóbirek qaýipsiz sanalatyn batys tasymaldaýshylarynyń ónimin alǵysy kelgen.
2022 jyly maýsymnyń sońynda CR929 ushaǵyn qurastyrý jobasyna qatysty túsinikteme bergen vitse-premer Iýrii Borisov "Qytaidyń bizdiń qyzmetten bas tartýy jiiledi" dep málimdegen.
2014 jyly Pekinge saparynda Resei prezidenti Vladimir Pýtin Qytaimen CR929 jańa ushaǵyn qurastyrý boiynsha áriptestik ornatý týraly kelisimge qol qoiǵan. Bul - aviatsiia salasynda Qytai men Resei arasynda jasalǵan eń iri kelisim. Onyń quny 50 mlrd dollarǵa baǵalanǵan.
Jobamen reseilik "Aviaqurylys korporatsiiasy birlestigi" jáne "Qytaidyń kommertsiialyq aviatsiia korporatsiiasy" ainalysqan. CR929 ushaǵy áýege alǵash ret 2025 jyly kóteriledi dep josparlanǵan. Eki modeli 2028 jyly paidalanýǵa berilýi tiis bolǵan.
Reseidiń Ýkrainaǵa basqynshylyǵyna jaýap retinde Eýroodaq Reseige ushaq bólshekterin tasymaldaýǵa, buǵan qosa tehnikalyq nemese saqtandyrý qyzmetin kórsetýge tyiym salǵan. AQSh aviatsiia salasy taýarlar eksportyn shektep, reseilik áýe kompaniialarynyń lainerlerine sanktsiia salǵan.
