Foto: Pixabay
Qytai syrtqy ister ministri Túrkiia, Saýd Arabiiasy jáne Irandaǵy áriptesterimen telefon arqyly sóilesip, Izraildi «shekten shyqty» dep synady, dep habarlaidy Kazinform.
Qytai Syrtqy ister ministrliginiń resmi saitynda jazylǵandai, syrtqy saiasat vedomstvosynyń basshysy Van I 15 qazanda Saýd Arabiiasy, Iran jáne Túrkiia Cyrtqy ister ministrlerimen telefon arqyly sóilesti.
Van I áńgimelesý barysynda Izraildiń Gaza sektoryna qarsy qazirgi áskeri operatsiialary ózin-ózi qorǵaý sheginen asyp ketkenin aitty.
Onyń atap ótýinshe, kez kelgen el ózin-ózi qorǵaý quqyǵyn paidalanǵan kezde jazyqsyz beibit turǵyndardyń qurban bolýy esebinen emes, halyqaralyq gýmanitarlyq quqyqty saqtaýy kerek.
Qytai ministri sondai-aq, Palestina halqyna qarsy ádiletsizdiktiń jarty ǵasyrdan beri jalǵasyp kele jatqanyn, sondyqtan Qytai Saýd Arabiiasy jáne basqa eldermen birge Palestinanyń ulttyq quqyqtaryn qalpyna keltirýdegi ádil isine qoldaý kórsetýge daiyn ekenin, Qytai Palestina máselesinde islam elderiniń «Biryńǵai daýys shyǵarýyn» qoldaitynyn da basa aitty.
Aita keteiik, bul - Qytai syrtqy ister ministriniń HAMAS 7 qazanda shabýylyn bastaǵannan keiin Izraildiń qarsy soqqysyn alǵash ret synǵa alǵany. Biraq osy ýaqytqa deiin ol shabýyldy bastaǵan HAMAS-ty áli ashyq aiyptaǵan emes. SIM málimetinshe, HAMAS-tyń Izrailge qarsy buǵan deiin jasaǵan shabýyldarynda Qytaidyń 4 azamaty qaza taýyp, altaýy jaralanǵan, ekeýi iz-túzsiz joǵalǵan.
Qytailyq BAQ-tyń habarlaýynsha, Qytai úkimetiniń Taiaý Shyǵystaǵy arnaiy ókili Chjai Tsziýn beibitshilikti ilgeriletýdi úilestirý úshin osy aptada Taiaý Shyǵys elderine barýdy josparlap otyr.
