Foto: reuters.com
AQSh Ókilder palatasynyń spikeri Nensi Pelosi Taivanǵa kelse, Qytai barynsha qatań sharalar qabyldaýǵa nietti. Bul týraly Qytai syrtqy ister ministriniń kómekshisi Hýa Chýnin aitty, - dep habarlaidy Tengrinews.kz tilshisi Reuters agenttigine silteme jasap.
Qytai syrtqy ister ministriniń kómekshisi Hýa Chýnin AQSh palatasynyń spikeri Nensi Pelosidiń Taivanǵa josparlanǵan saparyna bailanysty Qytaidyń AQSh-pen bailanysta ekenin aitty. Ol AQSh "tutas Qytai qaǵidasyn" qatań saqtaýy kerek dep qosty.
"Qytaidyń birneshe eskertýin elemegen amerikalyq taraptyń oilanbaǵan áreketterine qarsy bizdiń taraptan qandai sharalar qoldansa da, olar zańdy ári qajet", - dedi Hýa Chýnin Beijińdegi baspasóz máslihatynda.
Hýa Chýnin AQSh memlekettik hatshysy Entoni Blinkenniń Pelosi Taivanǵa barý-barmaýyn ózi qabyldaidy degen málimdemesine de jaýap berdi.
"Sizderge AQSh Qytaidyń egemendigi men qaýipsizdik múddelerine nuqsan keltirgeni úshin jaýapkershilikke tartylyp, onyń qunyn tóleitinin aita alamyn", - dedi Qytai sheneýnigi.
Eske salaiyq, Nensi Pelosidiń Taivanǵa saparyna qatysty ázirge resmi málimdemeler bolǵan joq, biraq sheteldik BAQ óz derekkózderine silteme jasap, ol aralǵa 2 tamyzda keshke barýy kerek dep jazady. Sondai-aq, 3 tamyzda Pelosi Taivan ákimshiliginiń basshysy Tsai Invenmen kezdesýi kerek ekeni habarlandy.
Buǵan deiin QHR tóraǵasy Si Tszinpin Taivan tóńiregindegi shielenistiń kúsheiýine bailanysty AQSh prezidenti Djo Baidenge eskertý jasaǵan bolatyn.
