Qytai men Resei BUU Qaýipsizdik keńesin Soltústik Koreiaǵa salǵan sanktsiiasyn jumsartýǵa kóndirýge kúsh salyp jatyr. Rezoliýtsiia jobasynda olar Soltústik Koreianyń ekonomikalyq qiyndyqtarǵa tap bolyp otyrǵanyn alǵa tartyp, "halyqtyń jaǵdaiyn jaqsartý maqsatynda" sanktsiialar alynýy tiis dep atap ótken.
Rezoliýtsiia jobasyn qurastyrǵandar teńiz ónimderi men mata eksporty jáne munai ónimderiniń importyna salynǵan sanktsiianyń kúshin joiýǵa shaqyrǵan. Sonymen birge Soltústik Koreia azamattarynyń shetelde jumys isteýine tyiym salynbaýyn da atap ótken.
Qaýipsizdik keńesine múshe elder arasynda taratylǵan rezoliýtsiia jobasynyń jai-japsaryn AP jáne Reuters agenttikteri jariialady. Qytai men Resei 2019 jyly da osyǵan uqsas rezoliýtsiia taratqan. Batys elderi oǵan qarsylyq bildirip, qujat resmi túrde daýysqa da salynbady.
Azat Eýropa/Azattyq tilshileri sóilesken aty-jónderin atamaǵan diplomattar "sońǵy rezoliýtsiia da solai qarsylyqqa tap bolýy yqtimal, sebebi Soltústik Koreia BUU sanktsiiasynyń sharttaryn áli de buzyp otyr" dep aitqan. AQSh-tyń BUU-daǵy missiiasy Baiden ákimshiligi "sanktsiia rejimin budan bylai da qoldai beredi" jáne BUU músheleri Pheniannyń zańsyz áreketine kóbirek nazar aýdarýy tiis dep málimdedi.
