Biyl Aspan asty eliniń basty merekesi - Qytai Jańa jyly («Chýntsze» kóktem merekesi, ai kúntizbesi boiynsha dástúrli Jańa jyl) 11 aqpannan 12 aqpanǵa qaraǵan túni keldi, dep habarlaidy QazAqparat.
Dástúrge sáikes, Qytai Jańa jylyn merekeleýge daiyndyqty bir apta buryn «Kishi Jańa jyl» dep atalatyn ýaqyttan bastaidy, al merekeniń aldyndaǵy is-sharalar tizbegi qatań túrde kúnder boiynsha josparlanǵan.
Alaida qazir QHR azamattary bul tártipti ustanbaidy. Tek «Chýntsze» merekesine deiin úidi tazalap, jinap, ótip bara jatqan jyldyń sátsizdigimen bailanysty barlyq «qoqystardan» qutylýdy ádetke ainaldyrǵan. Eresekter balalarmen birge terezelerge ilingen qyzyl qaǵaz órnekterin qiyp, úige kireberis oryndy shamdarmen bezendiredi, jańa jyldyq tilekteri jazylǵan qaǵazdardy úidiń esikterine ilip qoiady.
Biyl koronavirýsqa bailanysty Beijiń ákimshiligi el astanasynyń turǵyndaryn jańa jyldyq merekeler kezinde meiramhanalarǵa barýdan aýlaq bolýǵa shaqyrdy.
Qytai astanasynyń turǵyndary men qonaqtary úshin demalys aptasy kezinde saiabaqtarǵa, haiýanattar baǵyna jáne basqa da ashyq týristik oryndarǵa kirý tegin, sondai-aq Beijińniń qala mańyndaǵy aýdandaryna joǵary jyldamdyqty tas joldarmen tegin jol júrý júiesi engizilgen.
Dástúr boiynsha, Qytai Jańa jyly bastalǵannan keiingi alǵashqy úsh kúnde adamdar basyn jýyp, shashyn qiyp tastai almaidy, óitkeni bul «bailyqtyń joǵalýyn» bildiredi, sonymen qatar dál osyndai sebeptermen páterdi tazalamaý kerek.
Eske sala keteiik, ai kúntizbesi boiynsha Jańa jyl 12 aqpanda keldi. Qytaida Jańa jyldy toilaý eki aptaǵa sozylady jáne shamdar merekesimen («Iýansiatsze») aiaqtalady.
