Qytai Qazaqstanǵa strategiialyq áriptes retinde qaraidy. Bul týraly QR Prezidentiniń baspasóz hatshysy Berik Ýáli aitty, dep habarlaidy "Ult aqparat".
«Jalpy, Qytai joǵary tehnologiia ónimderin óndirý boiynsha jahandyq deńgeide kóshbasshy sanalady. Ony moiyndaýymyz kerek. Keshegi sapary barysynda oǵan ózimiz de kóz jetkizdik. Onyń ústine álemdegi ekonomikasy damyǵan ekinshi el sanalady. Osyndai áleýeti myqty kórshimen aralaspai, shekarany jaýyp otyrý múmkin de emes. Muny barlyǵyńyz jaqsy bilesizder. Sol sebepti mynany túsinýimiz kerek dep oilaimyn, Qytai bizge óziniń ideologiialyq saiasatyn júrgizip, tańyp, qandai da bir basqasha quityrqy oiyn jasap otyrǵan joq», - dedi ol.
QR Prezidenti baspasóz hatshysynyń aitýynsha, qaita biz olardyń jańa tehnologiialaryn kúndelikti ómirde paidalanýǵa, innovatsiialyq jańalyqtaryn óndiris oryndaryna engizýge múddelimiz.
«Sonymen qatar Prezidentimiz Qasym-Jomart Toqaevtyń tsifrlyq ekonomikaǵa kóshý tapsyrmasyna sáikes qytai tájiribesine súiený de mańyzdy mindet dep esepteimiz. Qytai Qazaqstannyń jerine eshqashan da kóz alartyp qaramaidy. Bizdiń territoriialyq tutastyǵymyzdy tolyq moiyndap otyr. Qazaqstanǵa tek strategiialyq áriptes retinde qaraidy. Onyń negizgi maqsaty - saýda jasaý. Saýda arqyly paida tabý. Álemniń qai túkpirinde júrmesin, bul - olardyń basty muraty, maqsaty», - dedi Berik Ýáli.
Sondai-aq, brifing barysynda Prezident kómekshisi Murat Nurtileýov Qasym-Jomart Toqaevtyń QHR Tóraǵasy Si Tszinpindi Qazaqstanǵa resmi saparmen kelýge shaqyrǵanyn aitty.
«Kelissózder barysynda Qasym-Jomart Kemeluly Qytai tóraǵasyn Qazaqstanǵa resmi saparmen shaqyrdy. Onyń naqty merzimderin Syrtqy ister ministrligi diplomatiialyq arnalarmen pysyqtaityn bolady. Sonymen qatar birqatar qytai kompaniiasy Qazaqstanǵa sapar shegýdi josparlap otyr. Olarmen biz jańa baǵyttarda jaqsy jumys isteýge sóz bailastyq», - dedi Prezident kómekshisi.
Sonymen qatar ol Qazaqstan Prezidentiniń Qytaiǵa eki kúndik memlekettik sapary jemisti ótkendigin aitty.
«Jalpy, Beijińde, Hanchjoýda bolǵan baǵdarlama aldyn ala Prezident Ákimshiligi, Syrtqy ister ministrligi jáne basqa da memlekettik organdardyń qatysýymen daiyndalǵan tujyrymdarǵa tolyq sáikes boldy dep aita alamyz. Qos Memleket basshylary jyly jáne dostyq raida kelissózder júrgizdi. Onyń barysynda diplomatiialyq qatynastar ornatylǵan 27 jyldyń ishinde Qazaqstan men Qytai arasynda ártúrli salada qol jetkizilgen eleýli nátijeler joǵary baǵalandy», - dedi M.Nurtileýov.
