Qytaida turatyn etnikalyq qazaq Ýálihan Sailike Tokio Olimpiadasynda grek-rim kúresinen qola medal jeńip aldy, dep habarlaidy Sputnik Qazaqstan.
Týrnir basynda Sailike nemis balýany Eten Kissindjerden basym túsken. Al ekinshi ainalymda japoniialyq sportshydan utylǵan bolatyn. Biraq Kenitiro Fýmita finalǵa shyqty. Sonyń arqasynda Qytai qazaǵy Sailike jubanysh beldesýine joldama aldy. Ol aldymen aljirlik balýandy aiqyn basymdyqpen jeńdi. Odan keiin qola medal úshin ótken jekpe-jekte ýkrainalyq Lenýr Temirovty 3:1 esebimen tize búktirdi. Osylaisha Tokio Olimpiadasynyń júldegeri atandy.
Búginde Qytai quramasy medal sany jaǵynan kósh bastap tur. Bul eldiń sportshylary 59 medal (28 altyn, 16 kúmis jáne 15 qola) jeńip aldy.
Aita keteiik, Tokio Olimpiadasynda grek-rim kúresi jarystaryna qazaqstandyq balýandar da qatysyp jatyr. Kúni keshe Rio Olimpiadasynyń qola júldegeri Elmira Syzdyqova (76 keli) men Meirambek Ainaǵulov (60 keli) qyrǵyz sportshylarynan utyldy. Búgin Demeý Jadyraev (77 kelige deiin) ta jarys jolynan shyǵyp qaldy. Endi Nursultan Tursynov qaldy. Al áielder arasyndaǵy kúres jarystaryna Valentina Islamova (50 keli) men Tatiana Ahmetova (53 keli) qatysady.
