Foto: Tiwy.com
Aqtóbe oblysynyń Qobda aýdanynda 4-synyp oqýshylary jappai ýlanyp, aýrýhanaǵa jetkizildi, dep habarlaidy oblystyq densaýlyq saqtaý basqarmasynyń baspasóz qyzmeti.
Atalǵan oqiǵa 18 aqpanda Qobda aýdanynda bolǵan. Qobylandy batyr atyndaǵy orta mekteptiń 23 oqýshysy shuǵyl aýrýhanaǵa jatqyzyldy. Tórtinshi synyp oqýshylarynda júrek ainý, kózden jas aǵý jáne bórtpe belgileri baiqaldy.
"Oqýshylardyń biri mektep janyndaǵy dúkennen qytai táttisin ákelgen. Ony jegennen keiin jeti bala ózin nashar sezinip, taǵy toǵyzy qatty iisten aýyryp qaldy", – dep habarlady Aqtóbe oblysynyń densaýlyq saqtaý basqarmasy.
Qobda aýdany ákimdiginiń ishki saiasat bóliminiń basshysy Arman Qabylovtyń sózinshe, synyp jetekshisi balalardyń jaǵdaiy nasharlaǵanyn baiqap, dereý jedel járdem shaqyryp, ata-analar men mektep ákimshiligine habarlaǵan.
Barlyq bala aýdandyq aýrýhanada qaraldy. Oblystyq densaýlyq saqtaý basqarmasynyń málimetinshe, jeti bala tamaqtan ýlanǵan, qalǵandary ingaliatsiialyq jolmen ýlanǵan. Qazir aýdandyq aýrýhanada toǵyz bala jatyr. Olardyń jaǵdaiy turaqty dep baǵalandy. Kámpit saraptamaǵa jiberilip, tergeý amaldary júrgizilip jatyr.
19 aqpanda tańerteń olardy oblys ortalyǵynyń pediatr dárigeri qarady.
Eske salsaq, buǵan deiin Mańǵystaýda 460 balany ýlandyrǵan mektep ashanasynyń qyzmetkerlerine aiyppul salynǵan edi.
