Foto: QR Sportty damytý direktsiiasy
Qazaqstannan IH qysqy Aziia oiyndaryna shamamen 140 sportshy qatysady, dep habarlady Týrizm jáne sport ministrliginiń Sport jáne dene shynyqtyrý isteri komiteti tóraǵasynyń orynbasary Azamat Imashev.
«2025 jyldyń 7-14 aqpan aralyǵynda Qytai Halyq Respýblikasynyń Harbin qalasynda ótetin IH qysqy Aziia oiyndaryn Harbin men odan 200 shaqyrym shyǵystaǵy Iabýli qalasy qabyldaidy. Harbinde konkimen júgirý, shaibaly hokkei, kiorling siiaqty jarystar ótse, Iabýlide shańǵy sporty, biatlon jáne shańǵy alpinizmi uiymdastyrylady», - dedi Imashev Ortalyq kommýnikatsiialar qyzmetinde ótken baspasóz máslihatynda.
Onyń málimetinshe, bul oiyndarǵa 30-dan astam elden shamamen 1,2 myń sportshy qatysyp, sporttyń 6 túrinen (11 distsiplina: biatlon, taý shańǵysy, kiorling, konkimen júgirý, short-trek, mánerlep syrǵanaý, shańǵy jarysy, snoýbord, fristail-akrobatika, shaibaly hokkei, ski-alpinizm) 196 medal jiyntyǵyn sarapqa salady.
«Qazaqstan Ulttyq quramasy atalǵan 6 sport túrinen 139 sportshyny (71 er, 68 áiel) qatystyrady. Olar 50 medal jiyntyǵyna talasady», - dep qosty vedomstvo ókili.
Qurama sapynda biatlonnan 10, kiorlingten 12, konkimen júgirýden 20, mánerlep syrǵanaýdan 4, short-trekten 12, shańǵy jarysynan 12, erler shaibaly hokkeiinen 23, áielder shaibaly hokkeiinen 23, taý shańǵysynan 8, fristail-akrobatikadan 7, sondai-aq shańǵy jarysynan 8 sportshy qatysady.
1996 jyly Harbinde ótken úshinshi qysqy Aziia oiyndarynda Qazaqstan 14 altyn, 9 kúmis, 8 qola júldege ie bolyp, jalpy esepte ekinshi oryn alǵan. Qazaqstan sol 1996 jyldan beri qysqy Aziia oiyndaryna qatysyp, osy ýaqyt aralyǵynda 78 altyn, 62 kúmis jáne 56 qola medaldi (barlyǵy 196) jeńip aldy.
