Bilim jáne ǵylym ministrligi orta mektepterde otbasy qundylyqtary men ulttyq tárbiege baǵyttalǵan arnaiy pán engizý kerek. Bul týraly búgin Almatyda ótken jiynda QR Memlekettik hatshysy Qyrymbek Kósherbaev aitty, dep habarlaidy QazAqparat.
«Qazirgi tańda jurtshylyqpen jumyla talqylaýdy qajet etetin taǵy bir kókeikesti rýhani taqyryp – otbasy máselesi. Jalpy, jahandaný zamanynda ult retinde saqtalyp qalý úshin otbasydaǵy urpaq tárbiesiniń máni zor. Osyǵan orai, Bilim jáne ǵylym ministrliginiń orta mektepterde otbasy qundylyqtary men ulttyq tárbiege baǵyttalǵan arnaiy pán engizý boiynsha usynystar engizetin kezi keldi dep oilaimyz. Sonymen birge, belgili ǵalymdar, qoǵam qairatkerleri men kópbalaly analardan quralǵan ata-analar uiymyn quryp, ministrlikpen birlesip «Otbasy – orta mektep» atty jastarǵa tárbie berýdiń jalpyhalyqtyq ádistemesin ázirleý qajet degen oidamyz», - dedi Memlekettik hatshy.
Qyrymbek Kósherbaev ziialy qaýym ókilderinen tyń oi pikir, usynystary bolsa ortaǵa salýyn ótindi.
«Endigi jerde Elbasy Nursultan Ábishuly Nazarbaev usynǵan «Rýhani jańǵyrý» baǵdarlamasynyń tyń tynysy ashylady deýge ábden bolady. Jahandyq daǵdarysty jeńil eńserý úshin halyqtyń sanasyn, ómir-salty men ustanymdaryn transformatsiialaýymyz kerek. Bul turǵyda baǵdarlamanyń jańa jobalary qajet. Osy tusta barshańyzdy, iaǵni, ziialy qaýymdy, ártúrli áleýmettik top ókilderin ortaq pikirlesýge, jańa jobalardy birlese jasaýǵa shaqyramyz. Usynystardy máseleniń mańyzdylyǵyna qarai, Memlekettik hatshynyń atyna tikelei jiberýlerińizdi suraimyn. «Rýhani jańǵyrý» baǵdarlamasy sheńberinde dúniejúzilik pandemiia tusynda jáne odan keiingi kezeńde halyqtyń boiyna jańa qundylyqtar qalyptastyrý boiynsha usynystar engizińizder. Qajet bolǵan jaǵdaida ziialy qaýym ókilderi, qoǵam qairatkerleriniń qatysýymen jańa jobalar boiynsha qajetti keńester ótkizip, oi-pikirlerin jinaqtap otyramyz», - dedi ol.
Aita keteiik, 2020 jylǵy 1 qyrkúiekte Memleket basshysy Qasym-Jomart Toqaev Parlament palatalarynyń birlesken otyrysynda Qazaqstan halqyna jyl saiynǵy dástúrli Joldaýyn jariialady.
