Qasietti Táýelsizdigimizdi kózimizdiń qarashyǵyndai saqtap, óskeleń urpaqqa amanat etý - barsha Qazaqstan halqynyń asyl muraty. Bul týraly Qazaqstan Táýelsizdiginiń 30 jyldyǵyna jáne Alǵys aitý kúniniń 5 jyldyǵyna arnalǵan dóńgelek ústel barysynda QR Memlekettik hatshysy Qyrymbek Kósherbaev aitty, dep habarlaidy QazAqparat.
«Elimizde kóktemniń alǵashqy kúnin – Alǵys aitý kúni dep belgileýdiń erekshe simvolikalyq máni bar. Ejelden erkin dalada tabiǵatpen úndesip taǵdyr keshken halqymyz úshin kóktemmen birge keletin áz-Naýryz – jańarý men jasarýdyń, jaqsylyq pen yrys-yntymaqtyń nyshan retinde aishyqtalǵan. Búgingi BAQ-ta jariialanǵan Memleket basshysynyń, Elbasynyń, kóptegen qazaqstandyqtardyń joldaǵan quttyqtaýlaryndaǵy igi tilekter qabyl bolǵai! Myń da bir raqmet, Táńirge, taǵdyrǵa, otandastarǵa, qazaq halqyna!», - dedi Qyrymbek Kósherbaev Qazaqstan Táýelsizdiginiń 30 jyldyǵyna jáne Alǵys aitý kúniniń 5 jyldyǵyna arnalǵan dóńgelek ústel barysynda.
Osy rette ol biyl táý eter Táýelsizdigimizge 30 jyl tolyp otyrǵanyn atap ótti.
«Adamzat tarihynda árbir el ejelgi zamandardan beri azattyq pen erkindik úshin arpalysyp kele jatqany belgili. Bizdiń ata-babalarymyz da araily azattyq úshin qansha ǵasyrlar boiy qanyn tógip, janyn berdi. Egemendik úshin kúresti, erkindik úshin tiresti. Mine, osy qasietti Táýelsizdigimizdi kózimizdiń qarashyǵyndai saqtap, qazyǵyn bekitip, óskeleń urpaqqa amanat etip qaldyrý bizdiń, iaǵni, barsha Qazaqstan halqynyń asyl muraty, asyl paryzy dep bilemiz», - dedi ol.
Qyrymbek Kósherbaev taǵdyrynda «talai tar jol, taiǵaq keshýden» ótip, «myń ólip, myń tirilgen» qazaq halqy ótken ǵasyrdyń ózinde myń san alapat pen zulmatty bastan ótkergenintarihtan belgili ekendigine nazar aýdartty.
«Sonyń ishinde halqymyzdy teń jartysynan aiyrǵan asharshylyq zamanyndaǵy orny tolmas taqsiret, erkindik jolyndaǵy saiasi qýǵyn-súrginge ushyraǵan Alash arystarynyń qasiretti taǵdyry jáne basqa da qaterli kezeńder qazaq halqynyń saǵyn syndyryp, jigerin muqata alǵan joq. Táýelsizdikke degen kúres eshqashan tolastaǵan emes. Taǵdyrdyń osyndai talai synaǵyna tótep bere júrip, jany jomart, minezi qaisar qazaq halqy keńester kezinde dúrbeleńge túsip, deportatsiiaǵa ushyraǵan kóptegen ulttar men ulystarǵa pana boldy. Qushaǵyn jaiyp, esigin ashty. Shiettei bala-shaǵasynyń aýyzynan jyryp, bir túiir nandy bólisip jedi. Bári bir kisiniń balasyndai baýyrmal tirshilik keshti. Halqymyzdyń sol ystyq yqylasy búgingi Táýelsizdik jyldary irgesi sógilmes bereke men birliktiń, yrysy mol tirliktiń kepiline ainalyp otyr», - dedi Memlekettik hatshy.
Bul oraida ol Táýelsizdiktiń nyǵaiýy men elimizdegi san etnostardyń yntymaq pen birlikte ómir súrýine yqpal etken Tuńǵysh Prezident – Elbasynyń arihi róli men ólsheýsiz eńbegin erekshe atap kórsetýimiz kerektigin aitty.
«Etnosaralyq kelisim, qoǵamdyq beibitshilik pen turaqtylyq Tuńǵysh Prezident Nursultan Nazarbaevtyń myzǵymas úsh ustanymyna jáne saiasi filosofiiasynyń berik tuǵyryna ainaldy. Elbasynyń osy sarabdal saiasi ustanymyn búgingi tańda Memleket basshysy Qasym-Jomart Toqaev tereń paiymmen, ornyqty baǵytpen, taǵlymy mol sabaqtastyqpen dáiekti túrde jalǵastyryp otyr», - dedi Qyrymbek Kósherbaev.
