Batys Qazaqstan oblysynda qyryqtan astam qoidy qasqyr qyryp ketti, dep habarlaidy QazAqparat tilshisi.
«Jas dáýren» sharýa qojalyǵynyń jetekshisi Nurlan Dosanovtyń aitýynsha, tosyn oqiǵa Syrym aýdany Sholaqańqaty aýyldyq okrýgine qarasty Ańqaty aýyly mańynda oryn aldy.
«6 qarasha kúni keshkisin jaiylymda júrgen qoilar aman edi. Shamasy, qasqyr maldy úrkitip, aidap ketken sekildi. Erteńine baryp qaraǵanda, 60 bas qoidyń 41-in qasqyr jegen, jaryp tastaǵan. Talanǵandary da bar. Sonyń 8-i pyshaqqa ilindi. Toqtylardy tapsyryp jiberip edim, bári de saýlyq qoilar edi. 19-y ǵana aman qaldy», - dedi N.Dosanov.
Aita keteiik, bul - ázirge birinshi oqiǵa. Qasqyrdyń malǵa shabýy qysqa qarai kóbeietini belgili.
