Qyrǵyzstannyń ulttyq qaýipsizdik jónindegi memlekettik komiteti (UQMK) 21 qazanda burynǵy prezident Asqar Aqaevqa taǵylǵan aiyptardyń barlyǵy alyndy degen aqparatty teristedi, dep habarlaidy Azattyq radiosy.
UQMK málimdemesinde "Qumtór isi" boiynsha tergeý amaldary jalǵasyp jatqany, Asqar Aqaevqa taǵylǵan aiyptyń alynbaǵany da aitylǵan.
"Buǵan qosa, burynǵy prezident Asqar Aqaevqa 1992 jyly "Kameko" kompaniiasymen kelisim jasaý jáne "Qumtórdi" 2003 jyly qaita qurylymdaý isine qatysty epizodtar boiynsha jańa aiyptar taǵyldy. Ol joǵaryda kórsetilgen qylmystardy moiyndap, tergeý organdarymen belsene jumys istep jatyr, al onyń el aýmaǵyna kirýi jáne shyǵýy aldyn ala tergeýshimen kelisilgen" delingen UQMK habarlamasynda.
Asqar Aqaev Bishkekke 14 jeltoqsanda kelgen. 20 jeltoqsanda onyń "Qumtór isi" boiynsha jaýap bergennen keiin Máskeýge ushyp ketkeni belgili boldy. Onyń áriptesi Bekbolat Talǵarbekov tergeý organdary oǵan taǵylǵan aiyptardyń barlyǵyn alyp tastaǵanyn habarlaǵan.
Máskeýge oralǵan soń Aqaev "Moskovskii Komsomolets" basylymyna bergen suhbatynda ózine taǵylǵan aiyptardyń barlyǵy alynǵanyn, barlyq istiń jabylǵanyn aitqan.
Ol alǵash ret Qyrǵyzstanǵa biyl tamyz aiynda kelip, "Qumtór isi" boiynsha UQMK suraqtaryna jaýap berip, artynsha Reseige oralǵan. Oǵan deiin "Qumtór" altyn kenishin satý kezinde jemqorlyqqa aralasty" degen aiyppen izdeýde bolǵan.
Burynǵy premer-ministrler Tursynbek Chynǵyshev, Apas Jumaǵulov jáne "Qyrǵyzaltyn" memlekettik kontserniniń burynǵy prezidenti Dastan Saryǵulov "Qumtór" kenishi boiynsha bas kelisimge kelip, 1994 jyly ózgertkende jemqorlyq jasady" degen aiyppen syrttai qylmystyq jaýapqa tartylǵan.
Asqar Aqaev 1990 jyldan 2005 jylǵa deiin Qyrǵyzstan prezidenti boldy. 2005 jyly 24 naýryzda Qyrǵyzstanda halyq tolqýy bolyp, sonyń nátijesinde elden ketýge májbúr bolǵan. Otbasymen birge Reseige qashqan Aqaev sol jaqtan saiasi baspana aldy.
Qumtór – Qyrǵyzstandaǵy eń iri altyn kenishi. Odan túsken kiris el ekonomikasynyń shamamen 9 paiyzyn quraidy. Qyrǵyzstannyń qazirgi basshylyǵy burynǵy bilik tusynda kenish ainalasynda jemqorlyqpen kelisim-shart jasalǵan dep sanaidy. Burynǵy sheneýnikter men kenishti igerýmen ainalysqan kanadalyq Centerra Gold kompaniiasy muny joqqa shyǵarady.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
