Prezident Qasym-Jomart Toqaevtyń tapsyrmasy boiynsha Qyrǵyzstanǵa 4500 tonnaǵa jýyq bidai uny tielgen gýmanitarlyq kómektiń alǵashqy partiiasy jetkizildi, dep habarlaidy QR SIM baspasóz qyzmeti.
Ony tapsyrý rásimine Qazaqstan Elshisi Rápil Joshybaev jáne Qyrǵyzstannyń Aýyl, sý jáne orman sharýashylyǵy ministriniń orynbasary Azamat Mýkashev qatysty.
Júk barlyq sanitarlyq-epidemiologiialyq normalar saqtala otyryp, temirjol arqyly 75 vagonmen jetkizildi.
Ministrdiń orynbasary A.Mýkashev qyrǵyz tarapy Qazaqstan Úkimetiniń kórsetken kómegin joǵary baǵalaitynyn, baýyrlas qazaq halqyna tereń rizashylyq bildiretinin jáne atap ótti.
Memleket basshysy Qyrǵyz Respýblikasymen dástúrli dostyq, odaqtastyq jáne strategiialyq áriptestik qaǵidattaryn basshylyqqa ala otyryp, Qazaqstan halqynyń atynan baýyrlas qyrǵyz halqyna gýmanitarlyq kómek kórsetý týraly sheshim qabyldaǵany belgili. Beriletin gýmanitarlyq kómektiń jalpy kólemi 10 myń tonna undy quraidy.
Aita ketý kerek, COVID-19 pandemiiasy bastalǵaly beri Qazaqstan qyrǵyz tarapynyń ótinishi negizinde Qyrǵyzstanǵa gýmanitarlyq kómek kórsetip keledi. Atap aitqanda, 2020 jyldyń mamyr aiynda kórshi elge 5 myń tonna qazaqstandyq un tegin berildi. Al sol jylǵy qarashada Qazaqstan úkimeti Qyrǵyzstanǵa elimizde shyǵarylǵan 400 portativti ókpe jeldetý apparaty men 2 mln meditsinalyq betperde jiberdi.
