Qyrǵyz Respýblikasynyń Úkimeti janyndaǵy Qoǵamdyq keńes jáne memlekettik múlikti basqarý jónindegi qordyń ujymy barlyq saiasi toptar men Qyrǵyz halqyna memlekettik obektilerdi reiderlik basyp alýdy toqtatýdy ótindi. Bul týraly Kabar agenttigi habarlady.
«Qazirgi ýaqytta Qyrǵyzstanda saiasi daǵdarys pen eldegi jaǵdaidy turaqtandyrý protsesi júrip jatyr. Alaida, osy qiyn-qystaý kezeńde memleket menshigindegi memlekettik kompaniialardy, kásiporyndardy zańsyz basyp alý áreketteri bastaldy. Durys baǵyttaǵy saiasi kúshter men belsendi azamattyq qoǵam eldegi zańdylyq pen tártipti ornatýǵa tyrysqan kezde, keibir destrýktivti kúshter saiasatkerlerdiń, saiasi partiialardyń jáne qylmystyq avtoritetterdiń atyn jamylyp, memlekettik nysandardy basyp alýǵa tyrysýda. Kóptegen jerlerde tonaý, urlaý jáne reiderlik basyp alý protsesi júrip jatyr», - dedi vedomstvo.
Osy jaǵdaiǵa bailanysty Qoǵamdyq keńes jáne memlekettik múlikti basqarý qory mynany habarlady:
«Qyrǵyz Respýblikasynyń legitimdi jáne zańdy úkimeti qurylǵanǵa deiin memlekettiń qatysý úlesi bar aktsionerlik qoǵam (AQ) mem memlekettik kásiporyndaryń (MK) barlyq basshylary mindetin ýaqytsha atqarýshy mártebesinde qaldyrylsyn. Ózin memlekettik obektiniń basshysy retinde taǵaiyndaǵandar,reiderlik basyp alýdy jasaǵandar, alaiaq dep aiyptalyp, Qyrǵyzstan zańnamasynyń normalaryna sáikes jaýapqa tartylady».
Aita ketsek, buǵan deiin «Bishkeksýýkanaly» óndiristik-paidalaný basqarmasynyń (ÓPB) strategiialyq mańyzdy nysanyn reiderlik jolmen basyp alýǵa daiyndyq júrýde ekenin habarlady.
Sonymen qatar, 6 qazan kúni «Kyrgyzkómúr» memlekettik kásipornynyń Kara-Keche filialyn 100-ge jýyq belgisiz adam basyp alǵan. Kómir kenine shabýyldy qylmys áleminde «Saiaq» laqap aty bar M. Qadyrqulov uiymdastyrǵan. Olar kómir satýdan túsken 1,5 mln-ǵa jýyq somdy (8,13 mln teńge shamasynda) filialdyń kassa qyzmetkerlerinen tartyp alǵan.
Eske salsaq, 4 qazan kúni Qyrǵyzstanda Jogorký Keneshke depýtattardy sailaý ótti. Depýtattyq mandatqa 16 partiia úmitkerlik etti. Daýys berýdiń aldyn ala málimeti boiynshy, 7% mejeni 4 partiia eńserdi.
5 qazan kúni sailaý nátijesine kóńili tolmaǵan bir top adam ortalyq alańda miting uiymdastyryp, odan keiin Aq úige bettedi. Olardy tarqatý úshin militsiia kóz jasaýratatyn gaz, sýatqysh jáne gaz-shýyldy qurylǵylar qoldanǵan. Bishkek ýaqytymen saǵat 22.00-degi málim boiynsha, aýrýhanaǵa zardap shekken 16 adam jetkizilgen. Keiingi málimet boiynsha, zardap shekken adamdar sany 911-ge jetti.
