Bishkek qalasynyń Oktiabr aýdandyq soty 30 qazanda Almazbek Atambaevtyń burynǵy keńesshisi Ikramjan Ilmiianovti jeti jylǵa bas bostandyǵynan aiyrdy.
Sot 2017 jylǵy prezident kampaniiasy kezinde 150 myń dollar kóleminde aqsha jymqyrdy dep aiyptalǵan Ilmiianovti kináli dep tapty. Ol taǵylǵan aiyptardy joqqa shyǵardy.
Sot buǵan qosa, Ilmiianovtiń múlikterin kámpeskelep, 160 myń som (2,240 dollar) kóleminde aiyppul tóleýdi mindettedi.
Joǵary instantsiiaǵa jazǵan hatynda Ilmiianov óziniń kinási dáleldenbegenin, sottan durys sheshim shyǵarýdy suraǵan.
Qyrǵyzstannyń burynǵy prezidenti Almazbek Atambaevtyń keńesshisi bolǵan Ikramjan Ilmiianov 2018 jyly qazan aiynda Reseidiń Tatarstan respýblikasynda ustalyp, keiinirek Qyrǵyzstanǵa ekstraditsiialanǵan.
Sarapshylar Ilmiianovti Atambaevtyń eń jaqyn serikteriniń biri dep sanaidy. Áýel basta Atambaevtyń júrgizýshisi bolǵan Ilmiianov prezident keńesshisi qyzmetine deiin ósken.
Qyrǵyzstandy 2011-2017 jyldar aralyǵynda basqarǵan 63 jastaǵy Almazbek Atambaev qazir Qyrǵyzstannyń memlekettik ulttyq qaýipsizdik komitetiniń tergeý izoliatorynda otyr. Oǵan arnaiy depýtat komissiiasy alty aiyp artqan. Onyń ishinde "Almazbek Atambaev aty-shýly qylmysker Áziz Batýkaevty zańsyz bosatýǵa aralasty", "Bishkek jylý elektr stantsiiasyn jańartý kezinde jáne oǵan kómir jetkizý kezinde jemqorlyqqa qatysty" degen aiyptar bar. Almazbek Atambaev mundai aiyptaýlardyń artynda saiasi maqsat bar dep esepteidi.
Ishki ister ministrligine tergeýge barýǵa bas tartqandyqtan 7-8 tamyzda Shý oblysynyń Qoi-Tash aýylynda "burynǵy prezident Atambaevty tergeýge májbúrlep ákelý sharasy" ótken. Shara barysynda arnaiy qyzmet ókili qaza bolyp, 170-ten astam adam jaralandy, 79-y - politsiia qyzmetkeri.
